Charter Document - 03276001

Hec sunt constitutiones hospitalis domus leprosorum de Scyreburn ab Hugone episcopo dicte domus fundatore constitute et carta sua roborate et processu temporis a Ricardo Dunolmensi episcopo approbate et confirmate et in multis ampliate In primis ergo statuit dictus Hugo episcopus ut in capella dicte domus ad serviendum deo et sancte Marie Magdalene et beato Nicholao sint continue tres sacerdotes et quatuor clerici duo scilicet ad serviendum altari sancte Marie Magdalene ebdomadario modo quorum unus ebdomada sua celebrabit cantando missam tempori congruentem et alius ebdomada illa pro fidelibus et vice versa tertius deputabitur officio sancti Nicholay et continue celebrabit pro defunctis et hec erit missa sororum leprosorum infra quarum domum a latere australi sita est dicta capella Quartum capellanum apposuit tempore suo dictus Ricardus Dunolmensis episcopus quem deputavit officio beate Marie virginis in capella nova quam in honore beate Marie virginis construxit a latere aquilonari maioris capelle ubi quartus sacerdos cotidie celebrabit missam de sancta Maria virgine cum sollempnitate et hec erit missa fratrum leprosorum et cotidie ultimo celebrabitur tum propter fratres debiles et mane surgere non valentes cum propter sacerdotes qui expletis officiis sibi deputatis omnes dicte misse intererunt Diebus vero dominicis et in maioribus sollempnitatibus ultimo celebrabitur magna missa in maiori capella ubi omnes intererunt tam clerici quam sacerdotes et illis diebus tantum aperientur hostia leprosorum tam fratrum quam sororum ut in domo fratrum omnes conveniant et in continuo silentio intrabunt et redibunt preeunte fratres leprosos eorum priore et priorissa subsequente sorores leprosas et sic missa celebrata domum suam intrabunt sorores et claudetur earum hostium Statuit etiam dictus Hugo ut dicte domus procurator semper sacerdos preficiatur et religiosus si bonus inveniatur vel secularis si melior inveniatur qui dictis sacerdotibus et dictis officiis in omnibus necessariis providebit et missam quam voluerit et cum voluerit et ubi celebrabit qui in vectura ita modeste se habeat ut numerum trium equorum non excedat nisi aliter cogat necessitas Istorum etiam sacerdotum officiis et eorum sustentamento deputati sunt tres clerici vel quatuor nisi procurator fuerit sacerdos qui dictis sacerdotibus in divinis officiis ministrabunt quorum unus ad minus erit diaconus Omnes vero sacerdotes et clerici simul in camera iuxta capellam sita iacebunt preter unum quem procurator secum in camera sua habere voluerit et omnes simul cum procuratore in aula prandebunt et cenabunt nisi aliter cogat infirmitas Decrevit etiam idem Ricardus ut in tempore hiemali surgant dicti sacerdotes media nocte ad officium nocturnum perficiendum quo completo in silentio usque mane dormiant et tunc iterum in silentio ad ecclesiam redeant et officia diurna tempori congruentia signo prius in qualibet hora pulsato cantando compleant Estivo autem tempore ita surgant ut officium nocturnum compleant in diluculo et sic in lectis pausent et post modo prescripto ad officia diurna redeant Idem etiam statuit ut continue in maiori ecclesia [in] presentia corporis et sanguinis domini sit ignis perpetuus et quod semper in maiori missa in maiori capella celebrata et in missa beate Marie virginis accendantur ad minus duo luminaria Decrevit etiam idem episcopus ut secundum statuta Hugonis quondam Dunolmensis episcopi predecessoris sui quinque conventus leprosorum scilicet sexaginta et quinque continue ibi vivant et de bonis dicte domus pascantur et vestiantur et quod quilibet frater vel soror habeat unum panem in die quinque marcas ponderantem et unam galonam cervisie ita quod quilibet eorum habeat unam galonam in die et quod tribus diebus in ebdomada vescantur carnibus et quatuor diebus piscibus ita quod unum ferculum sive de carne sive de pisce sive de caseo sive de butiro duobus bene sufficiat Providit etiam ut in maioribus solemnitatibus per annum habeant duo fercula scilicet in quatuor primis diebus natalis domini in die circumcisionis in die epiphanie in die purificationis in die sancti Cuthberti in xl et in illo die solent dari salmones recentes pro uno ferculo si inveniri possint sin autem piscis recens si inveniri possit in die annunciationis in primis duobus diebus pasche in die ascencionis domini in die pentecostes in die trinitatis in inventione et exaltatione sancte crucis in die nativitatis beati Johannis Baptiste in die apostolorum Petri et Pauli in festo sancte Marie Magdalene in festo sancti Laurentii in die assumptionis et nativitatis sancte Marie virginis in die sancti Cuthberti in Septembri in die sancti Michaelis sed illo die dantur auce pro ferculo et quatuor habebunt unam aucam pro ferculo quod si die veneris vel die sabbati contigerit dantur die dominica proxima sequente in die omnium sanctorum in die sancti Andree apostoli in die anniversaria dedicationis ecclesie in die sancti Lazar De vestimentis etiam providit quod quilibet eorum habeat per annum tres ulnas de panno laneo scilicet russeto vel albo et sex ulnas de panno lineo et sex ulnas de kan evace in communi ad manutergia facienda et unusquisque quatuor denarios ad sotulares et sexcies per annum unguentum ad sotulares et tres petras cepi per annum In vigilia omnium sanctorum habebunt iiii trussas straminis et iii in vigilia natalis domini et iii truncos ad iii ignes in vigilia autem pasche iii trussas straminis in vigilia pentecostes iii faces iuncorum et iiii in vigilia beati Iohannis Baptiste et iiii in festo sancte Marie Magdalene Quando habebunt carnes recentes vel pisces recentes vel ova habebunt unam mensuram salis continentem xx partem unius raserii In carni previo habebunt unum raserium frumenti ad faciendum similam Cum autem unus obierit quod de domo percepit domui relinquat et alius pro eo gratis statim recipiatur de terra episcopi si ibi tot inveniantur leprosi sin autem aliunde recipiantur cum deus non sit acceptor personarum Fratres de comuni concensu priorem sibi de se eligant et sorores priorissam qui sub magistro eorum eos regulariter custodiant Regula leprosorum talis est fratres leprosi per se maneant similiter sorores leprosa per se ubi iiij habeant ignes ad quos cotidie a die sancti Michaelis usque ad diem omnium sanctorum habebunt duas sportas petarum et a die omnium sanctorum usque diem pasche habebunt iii sportas petarum quolibet die habebunt etiam duas sportas petarum preter predictas illis diebus quibus habent fercula duplicia Sporta vero petarum debet continere quinque raseria frumenti et duas pelves In vigilia vero natalis domini habebunt quatuor magnos truncos ad iiii ignes et unusquisque erit unius quadrigati Item in estate quando ducuntur pete habebunt fracturas reliquarum petarum Si quis autem frater leprosus vel soror languerit ita ut de eo desperatur habebit ignem et candelam et omnia necessaria quantum oportuerit donec melioretur vel moriatur Item die quo aliquis sepelietur cibus et potus detur sepelientibus similiter eorum cissor die quo scindit pannos suos habebit cibum et potum Habebunt etiam qualibet die dominica per annum decem panes albos scilicet v fratribus et v sororibus qui dispositione prioris et priorisse debent dari magis languentibus Sciendum etiam quod habebunt in qualibet ebdomada per annum bis vel semel ad minus pisces recentes si inveniri poterunt sed aliquando pro defectu piscium dantur alecia rubea aliquando caseus aliquando butirum secundum tempora et quando dantur alecia unicuique dentur tria quando vero butirum vel caseum tunc datur omnibus in comuni pondus unius petre et dimidie A pascha vero usque pentecosten pro defectu piscium casei et butiri dantur aliquando ova unicuique scilicet tria A pentecoste usque ad festum sancti Michaelis non dantur alecia rubea sed bene cavendum est quod nec putridum nec corruptum vel morticinum illis erogetur Item in xl habebunt duo raseria fabarum ad assandum in festo sancti Michaelis duo raseria pomorum Item debent habere coquinam et cocum ad eorum cibum faciendum et focale ad coquinam sufficiens et utensilia convenientia scilicet unum plumbum et duas ollas ereas unam tabulam unam tynam unum alveolum duas cunas ad cervisiam eorum suscipiendum duas cunas ad balneandum Item habebunt hec utensilia in domo iiii plumbos iii patellas iiii tripodes ii alveos unum belche et unum trubulum ad sepeliendum mortuos Item facient aliquando olera aliquando porretum aliquando fabas secundum tempora et quando faciunt olera habebunt cotidie preter sabbatum unam mensuram grosse farine avenarum continentem septimam partem unius raserii sed omni die sabbati habebunt illam mensuram et dimidiam pultium ad faciendum gruelam Habebunt etiam pultes in vigiliis videlicet omnium sanctorum natalis domini ascencionis Iohannis Baptiste assumptionis die cinerum Item habebunt diebus piscium ad corum coquinam unam mensuram salis continentem lxiii partem unius raserii ad potagium salsandum Item quedam vetula que ministrat infirmis habebit qualibet ebdomada tres panes frumenti et unum ferculum carnium vel piscium secundum tempora Item habebunt duas lotrices que lavabunt pre omnibus aliis operibus qualibet die sabbati eorum capita et bis in septimana eorum pannos et cotidie eorum utensilia Item habebunt unum capellanum de predictis iii capellanis assignatum ad divina facienda confessiones audiendas et ea que sacramentis pertinent ad plenum prosequenda et ad evangelium legendum in domibus leprosorum diebus dominicis et aliis festis maioribus languentibus qui non possunt ire ad ecclesiam similiter et ad exequias mortuorum faciendas Item habebunt in festis sollempnibus in eorum capellis luminare competens dum celebrantur divina et similiter thus horis debitis dominicis vero diebus aspersionem aque benedicte panem benedictum et alia que decent Item conceditur quod communes servientes eorum et speciales possint ire et redire sine impedimento et vendere non placentia et emere placentia et alia negotia expedire Item conceditur illis quod amici eorum et benevolentes possint sine impedimento eos visitare et confortare et cum eis moram per noctem facere scilicet longe venientes et advene noti vero et propinqui die quo veniunt recedant Item omnes domus eorum bene cooperantur et nullum nocumentum pestium patiantur Similiter ductus aque eorum ita conservetur ut nullum defectum aque patiantur Licebit etiam eis sine inpedimento ire et redire ad foveam iuxta cimiterium ubi colligunt aquam ad purgandum eorum domos Item parte eorum non debent claudi ante pulsationem collationis Item habebunt feretrum ad mortuos ferendos Omnes autem fratres et sorores qui fortes sunt de nocte surgant ad matutinas et intrent in capellam suam et horas suas more suo dicant videlicet pro matutinis xx et vi pater noster scilicet xiii pro matutinis diei et xiii pro matutinis beate Marie pro prima xiii simili modo pro tertia xiiii pro vi xiii pro ix xiiii pro vesperis xiiii pro completorio xiiii ita ut medietatem dicant pro horis diei et medietatem pro horis sancte Marie postea dicat quilibet eorum xxv pater noster pro peccatis propriis et totidem pro animabus episcoporum Dunelmensium et omnium fidelium defunctorum ita ut tam die quam nocte c et ix pater noster compleant Illi autem qui debiles sunt in lectis se erigant et ibi matutinas suas dicant debiliores in pace iaceant et quod possunt dicere dicant Qualibet hora pulsetur signum eorum tam de die quam de nocte et ante prandium et post quod pulsabit unus de sanioribus fratribus huic officio deputatus qui preces eorum dicet post completorium maneant in silentio donec in crastino prima pulsetur et dicatur nisi aliter cogat necessitas vel aliquid huiusmodi Ad horum observantiam detur eis ferula cuius custodiam habebit prior ut modo scolarium inde corrigat inobedientes et statuta transgredientes et excitet desides et negligentes Si quis autem inveniatur inobediens et contrarius et per ferulam nolens corrigi detrahantur ei victualia usque panem et aquam tantum semel secundo et tertio et si adhuc perseveraverit inobediens et contumax a comunione fratrum eiciatur et alius pro eo statim substituatur Cur aliquis frater vel soror obierit quilibet eorum dicet pro eo infra triginta dies proxime sequentes ccc pater noster exceptis orationibus cotidianis Omnes fratres veniant in capella sua ad disciplinam tribus diebus in ebdomada scilicet in xl et in adventu domini scilicet secunda et quarta et sexta feria nisi aliter cogat necessitas vel intervenerit magna solemnitas idem faciant sorores in capella sua presente priorissa cum sacerdote donec omnes vapulent Procurator autem dicte domus audiet quater in anno computationes suas scilicet in quatuor quarteriis anni de servientibus suis Hec omnia statuit Ricardus dei gratia Dunelmensis episcopus et carta sua confirmavit et inviolabiliter observari precepit Habebunt etiam predicti fratres et sorores annuatim quinque solidos et v denarios die exaltationis sancte crucis de anniversaria domini Martini de Sancta Cruce quondam predicte domus procuratoris