Charter Document - 03261300

In dei nomine amen Robertus permissione divina Cant archiepiscopus totius Anglie primas ad presentium ac preteritorum solatium et cautelam providam futurorum Lex dei maculatos nos excitat solusque caritatem impellit ut religiosis personis qui spretentibus vanitates seculi soli deo sub habitu et observantia regulari suo perpetuo servire promiserant quietem ad id congruam et temporalium facultatum presidium quibus se sustentare commodius ac manus ad pietatis opera largiores extendere valeant vigilanti conamine procuremus in cuius excogitato progressu certa consideratione perpendimus expedire ut litium et iurgiorum materias que pacem et tranquillitatem incessanter impediunt odia generant et facultates piis ut premittitur usibus deputandis extenuant quatinus est nobis possibile primitus amputemus quibus ita subductis ad premissa commoda et maiora via latior apparebit Exortis siquidem iam dudum litigiis inter religiosos viros abbatem et conventum monasterii de Begham Cicestren diocesis ex parte una et magistrum Robertum de Blechendon super ecclesia seu capella de Haylesham quam dicti religiosi ecclesie de Helyngle eis appropriate capellam et ab eadem dependentem esse dicebant dicto Roberto premissa negante et se ipsius ecclesie de Haylesham asserente rectorem ex altera et habitis inter eos exinde processibus variis ac diffusis ipsoque Roberto primo ac postmodum domino Bogono de Clare qui post eiusdem Roberti decessum ecclesiam de Haylesham prenotatam tenuerat dictis litibus adhuc pendentibus indecisis via universe carnis ingressis inter religiosos eosdem ecclesiam de Haylesham memoratam tanquam ecclesie sue de Helyngle [] capellam tenentes ex parte una et venerabilem fratrem nostrum Gilbertum Cicestren episcopum loci dioecesanum constantius asserentem dictam ecclesiam de Haylesham tanquam ab antiquo matricem ac parrochialem ecclesiam debere per secularem gubernari rectorem ex altera querelis etiam arduis noviter suscitatis et in curia Cant pro parte pendentibus partes eedem sanius informate et ad decisionem idoneam premissorum et status dicte ecclesie ordinationis per viam pacis procedi debere concorditer annuentes et nostro ordinationi ac diffinitioni se in hac parte totaliter submiserunt suasque submissionis ac renuntiationis litteras tam dicti religiosi pro se et suis successoribus quam etiam prefatus episcopus pro se et ei succedentibus in futurum necnon pro suo capitulo Cicestren ad id sententiam adhibentes consensum suis ad ea sigillis alternatim appositis nobis sub certis tenoribus penes partes nunc sub sigillo residentibus exhibebant Nos itaque submissiones huiusmodi ad partium predictorum instantiam acceptantes ac assumentes in nos onus expeditionis supradicti negotii per viam ordinationis finaliter faciendi rationes partium predictarum ad nostram super hiis informationem recepimus et eas cum nostro consilio sepius revolventes inspeximus de proventibus etiam vicarie ecclesie de Haylesham antedicte et de oneribus vicarie loci eiusdem incumbentibus ac aliis que negotium memoratum contingunt in partium predictorum presentia inquiri fecimus diligenter ex quibus ac ceteris omnibus que ad premissa nos de iure vel equitate monere debuerant enucliando perstrinximus et de iurisperitorum consilio super hiis omnibus sepius requisito pensatis ex intimo tam vexationibus dictorum religiosorum quam etiam cumulis sumptuum sepe per eos de bonis monasterii prenotati circa prosecutionem premissorum in diversis litigiis impensorum et oneris grandis pensionis annue eisdem religiosis ea occasione ut dicebatur imposterum quibus ipsum monasterium de Begham realiter est gravatum cum presumptionibus aliis dictis dependentibus que nos movent invocata spiritus sancti gratia finali deliberatione circa premissa decernimus diffinimus declaramus statuimus ac etiam ordinamus de hiis omnibus in hunc modum In primis videlicet quod dicta ecclesia de Haylesham cum omnibus iuribus ad ipsius rectoriam spectantibus tanquam capella prefate ecclesie de Helyngle et dependens ab ea predictis abbati et conventui de Begham et eorum successoribus ac monasterio loci eiusdem in usus proprios possidendi perpetuo infuturum remaneat pleno iure ipsamque ecclesiam seu capellam de Haylesham exabundanti appropriamus eisdem salva vicaria perpetua in capella seu ecclesia de Haylesham antedicta quam vicariam taliter ordinamus videlicet quod vicarius qui nunc est in ecclesia de Haylesham antedicta et sui successores vicarii imposterum preficiendi ibidem plene percipiant omnes oblationes in eadem ecclesia faciendas omnes obventiones altaris eiusdem scilicet omnes minutas decimas ipsius parrochie lactis lane agnorum vitulorum aucarum porcellorum molendinorum feni herbagii pasture pannagii ortorum pomeriorum apium columbarum mercature silve cedue venationis et de croftis seu terulis que in eadem parrochia pedibus fodientur aut manualibus instrumentis per manus dumtaxat hominum aut mulierum ibidem tanquam in messuagiis vel in ortis loco curtilagiorum colentur salvis abbati et conventui dicti monasterii de Begham qui erunt pro tempore omnibus privilegiis de immunitate decimarum eis competentibus et imposterum competituris quatinus iuxta privilegiorum ipsorum efficatiam et tenorem ac etiam consuetudinem hactenus habitam eis salvari poterunt aut debebunt ita tamen ut idem religiosi quo ad ecclesiam seu capellam eandem de Haylesham tanquam rectores eiusdem locorum ordinariis sint subiecti Item percipiat vicarius mortuaria et legalia principalia parrochianorum eiusdem et omnes alias minutas obventiones eidem parrochie ipso ecclesie iure parrochiali debitas et hactenus consuetas quas rectores seu vicarius loci eiusdem nomine rectorii vel vicarie percipere consueverunt exceptis maioribus decimis videlicet garbarum provenientium de terris ipsius parrochie per carucas vel animalia cultis preter maiores decimas subscriptorum terrarum in augmentum vicarie huiusmodi assignatas et excepta mansione rectorii ipsius ecclesie seu capelle ac domibus existentibus in eadem et terris dominicis ad rectorium ipsam spectantibus que quidem maiores decime garbarum manso rectorii et ipsius edificia ac terre dominice rectorii dictis abbati et conventui de Begham et suis successoribus in usus proprios perpetuo remanebunt excepta quadam portione terre de manso rectorii predicto quam dicto vicario et suis successoribus ibidem futuris vicariis ad curtilagium et gardinum mittendum et inibi assignamus Item quia portiones ad ipsam vicariam ut premittitur assignate vicario loci eiusdem ad eius onera supportanda sufficere non videmus assignamus ipsi vicario et eidem vicarie imperpetuum in augmentum eiusdem omnes maiores decimas provenientes de quadam terra in parrochia de Haylesham antedicta que vocatur le Brok que terra se extendit in longitudine ex parte boriali de Maystersheth per regiam viam usque ad Pludygate et sic circuit a predicta Pludygate inter la Mersland et la Marledeland usque ad domum Walteri at Walle sicut per fossatum includitur et a dicto loco usque ad domum Willelmi at Walle sicut per viam includitur et a domo dicti Willelmi usque ad cursum aque dictum Heldehenen et per dictum cursum aque ex parte australi usque ad domum Ricardi le Coy circumiendo terram Willelmi le Longhey et a domo Ricardi la Coy usque ad pontem nominatum Berebregge et a dicto ponte usque ad terram Simonis de la Hothe sicut includitur per cursum aque et a terra dicti Simonis usque ad stratam que ducit de Berebruchestruche versus la Maysheheche sicut bundatum est inter terram eiusdem Simonis et terram Walteri de Mereshale et sic per dictam stratam usque ad Mayster Leche ex parte occidentali Dictus quoque vicarius qui erit pro tempore unum presbiterum secundarium sibi socium in cantu et lectura idoneum in dicta deservientem ecclesia et in adiutorium ipsius vicarii in eadem parrochia suis sumptibus sustinebit Item inveniet idem vicarius cera ad luminare circa magnum altare item vinum et panem ad celebrandum in ipsa ecclesia per totum annum item vinum et panem benedictum in die Pasche item thus ad incensum Dicti vero abbas et conventus de Begham et successores eorum grangias et cetera edificia rectorii predicte suis sumptibus in statu congruo sustinebunt dictasque maiores decimas et proventus terrarum dominicarum rectorii predicte in grangiis ipsis et non alibi reponi facient et inibi triturari sub pena amissionis eiusdem beneficii si contra fecerint quoquo modo Iidem religiosi cancellum ecclesie antedicte de Haylesham suis sumptibus refici facient quotiens indigebit et si toto corruerit noviter fabricari Invenient etiam iidem religiosi in ipsa ecclesia libros et ornamenta congruis quotiens fuerit oportunum sed vicarius ea sub fide et competenti custodia preter casum fortuitum quem culpa ipsius vicarii non precesserit suo periculo servabit honeste et modicos refectiones librorum et ornamentorum huiusmodi videbit in ligitura et coopertura librorum et in consuendo vestimenta confracta etiam lavando eadem idem vicarius sumptibus suis agnoscet Dictus etiam vicarius inveniet in estate et predicti religiosi stratam ad dictam ecclesiam et cancellum eiusdem in yeme sustinebunt Etiam idem vicarius omnia ordinaria onera eiusdem ecclesie quo ad iura episcopalia vel archidiaconalia in eadem dicti vero religiosi extraordinaria onera ipsius ecclesie de Haylesham rectoriam qualitercumque tangentia plene agnoscent et ordinariis obedientiam facient tam pro ecclesia de Helynglee quam pro dicta capella de Haylesham sicut pro ipsa ecclesia de Helynglee facere consueverunt Ad ipsam vere vicariam cum eam vacare contigerit dicti abbas et conventus de Begham qui pro tempore fuerint episcopo Cicestren vel cui presentationes beneficiorum eiusdem diocesis iure dioecesano debebunt fieri tanquam ipsius vicarie patroni personam idoneam presentabunt Omnes vero processus prius coram quibuscumque iudicibus habitos de premissis inter partes predictas quatenus ut premittitur submittentes contingunt subducimus per decretum et nullius fore momenti imposterum declaramus Si vero dicti religiosi cuiuscumque exemptionis aut immunitatis obtentu seu quocumque colore questio contra hanc nostram ordinationem quicquam attemptare presumpserint et de hoc coram nobis et nostris successoribus aut sede archiepiscopali Cant vacante metropoliticam iurisdictionem habentibus quibus hunc articulum specialiter reservamus summaria cognitione convicti extiterint nisi infra mensem post monitionem unicam per nos nostrosve successores aut ut premittitur sede vacante custodes super hoc eis factam id plene correxerint suo iure quo ad prefatam ecclesiam seu capellam de Haylesham ex tunc prout ex nunc in hiis scriptis decernimus sint privati Hanc autem nostram ordinationem in omnibus suis articulis in futurum observari precipimus salva nobis et successoribus nostris aut sede Cant vacante metropolicam iurisdictionem habentibus quibus et hunc reservamus articulum potestate plenaria transgressores quoscumque ordinationis presentis quotiens opus fuerit canonice puniendos In testimonium vero et memoriam premissorum sigillum nostrum presentibus est appensum Act et dat apud Tenham in crastino sancti Marci evangeliste anno domini millesimo cc nonagesimo sexto consecrationis nostre secundo