Charter Document - 03260332

A nostre seigneur le rey e a son consail prie le soen chapelyn si lui plest Gilbert levesque de Cycestre qe par la ou lavaundit evesque pria a nostre seigneur le rey a un parlement a Westmouster graunt temps passe qe sont entretez en ascones provendres de Hastyng qe sont eglises parochieles oue cure des almes saunz estre a lui presentez par colour de doun nostre seigneur le rey cest a savoir mestre Thomas de Logor Edmond de Londres Wautier de Amotesham Adam de Blida e sire Andrieu de Nichole fussent a li presentez auxi come a lui e ses predecessours soleient estre les provendes de Hastyng touz jours avaunceo qe la baronye de Hastyng oue le chastel e les avouesons des provendres eschey en la meyn le rey par eschete dez Normantz e puys leschete dont levesqe ad les presentementz prestz a mouster qant il plerra a nostre seigneur le rei e son consail par lettres de souz le seaux nostre seigneur le rei qore est e de son peire le rei Henri Edwardo nostre seigneur le rei comaunda a meisme le parlement qe sur ceo fussent les roules de la chauncelrie enquis e enqueste prise la quele enqueste est prise e en la chauncerie returne e les roulles sont enquis par sir Adam de Osgotby e sont en sa garde par qei prie le dit evesque de sicome il fust aiorne au derreyn parlement a Westmouster qe estoit en quareme procheyn passee iusques au procheyn parlement suant qore est le quel aiornement sire Gilbert de Roubury fit arouller en son roulle per comandement qe nostre seigneur le rei a son consail le voillent deliverier solonc lenqueste prise e solonc record des roulles de la chauncelrie e solom les evidences qe avaunt dit evesque voudra tant tost mustrer e solom qil veyent qe resun e dreyt voudra kar en la demoere ad graunt peril des almes