Charter Document - 03260315
| Charter Number: | 03260315 |
|---|---|
| Cartulary Title: | Chichester 1254-1305 Volume 23 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1289 |
| Date type: | Internal, Calendar |
| Resource Link(s): |
|
Charter:
Magnifico principi et domino reverendo domino Edwardo dei gratia illustri regi Anglie domino Ybernie et duci Acquitannie Gilbertus eiusdem permissione Cycestren ecclesie minister modicus salutem in eo cuius providencia potentes iusticiam iudicant et reges in equitate regnant Excellencie vestre cuius est sponsam Cristi ecclesiam in suis iuribus et libertate tueri et in gladio punire iusticie quos in ipsius ecclesie iniuriam opprobrium et contemptum invenerit machinantes presentibus innotescat quod frater Radulphus de Baldoch canonicus de Begeham predicte Cycestren dyoecesis est per nos excommunicacionis sentencia auctoritate ordinaria innodatus in qua sordescens per quadraginta dies et amplius adhuc perseverare indurato animo non formidat claves ecclesie dampnabiliter contempnendo in anime sue periculum et scandalum plurimorum Cum igitur ultra non habeat ecclesia quid faciat in hac parte vestre celsitudini regie supplicamus quatinus iuxta regni vestri consuetudinem contra dictum excommunicatum extendere dignemini brachium seculare ut quem timor dei a malo non revocat corporalis pena cohibeat a peccato Augeat omnipotens dominacioni vestre honorem dierum longitudinem et salutem Datum apud Cacham iiii kalendas Decembris anno gratie millesimo CC octogesimo nono