Charter Document - 03260304
| Charter Number: | 03260304 |
|---|---|
| Cartulary Title: | Chichester 1254-1305 Volume 23 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1296 |
| Date type: | Internal, A.D., Feast |
| Resource Link(s): |
|
Charter:
Universis Cristi fidelibus presentes litteras visuris vel audituris Gilbertus miseratione divina Cicestrens episcopus salutem in domino sempiternam Universitati vestre notum facimus per presentes quod cum domina Margareta de Cameys super crimine adulterii cum domino Willelmo Paynel milite ut dicebatur commisso fuisset diffamata ac ea occasione coram nostro officiali ex mandato nostro ad certos diem et locum evocata predicta domina Margareta coram prefato officiali in ecclesia cathedrali Cicestr die Sabbati proxima ante festum purificationis beate Marie virginis anno domini mcc nonogesimo quinto personaliter comparens presentibus domino Willelmo decano ecclesie Cicestren magistro Roberto thesaurario dicte ecclesie et aliis loci eiusdem canonicis et aliis clericis et laicis quamplurimis predictum crimen adulterii sibi oppositum expresse negando exinde sollempniter et canonice se purgavit videlicet per dominas Margaretam Martel Isabellam de Monte Forti priorissam de Oseburn Hawisam de Houtot A Corbet et per alias mulieres coniugatos et domicellas quamplures convicinas Nos autem audito et cognito de purgatione supradicta ipsam approbantes predictam dominam Margaretam de Cameys a predicto crimine immunem prout iustum fuerat reputantes eam restituimus bone fame In cuius rei testimonium has litteras patentes dicte domine fieri fecimus nostro sigillo communitas Dat apud Aldingeburn die et anno supradictis