Charter Document - 03260267
| Charter Number: | 03260267 |
|---|---|
| Cartulary Title: | Chichester 1254-1305 Volume 23 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1281 |
| Date type: | Internal, Feast |
| Resource Link(s): |
|
Charter:
Excellentissimo domino suo domino Edwardo dei gratia illustri regi Anglie domino Hybernie et duci Aquitannie Stephanus eadem gratia Cycestren ecclesie minister humilis salutem et devotam in omnibus ad beneplacita voluntatem Sublimitati vestre regie presentium innotescat tenore quod Gilebertus dictus Sewyn de Nytunbr nostre dioecesis a nobis pro offensa manifesta excommunicacionis catena ligatus in eadem sententia per xl dies et fere tanto tempore duplicato claves ecclesie vilipendens sordescere minime formidavit Et cum sancta mater ecclesia non habeat ultra quid faciat nisi ut contra obstinatos huius brachium invocet seculare excellentiam vestram regiam devote rogamus quatinus ad huius perversorum reprimendam maliciam et aliorum exempla deterrenda eam quam vestra dominatio contra excommunicatos huius consuevit exercere vindictam contra ipsum si placet precipiatis exerceri ut sit regia vestra potestate perterritus ad sancte matris ecclesie gremium redeat eo citius licet invitus Corporis incolumitatem et vite diuturnitatem conservet vobis altissimus per tempora diuturna Datum apud Deringewyk in crastino sancti Michaelis anno domini MCCLXXX primo