Charter Document - 03260248
| Charter Number: | 03260248 |
|---|---|
| Cartulary Title: | Chichester 1254-1305 Volume 23 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1277 |
| Date type: | Internal, Feast |
| Resource Link(s): |
|
Charter:
Excellentissimo domino suo domino Edwardo dei gratia regi Anglie domino Ybernie et duci Aquitannie suus devotus Stephanus miseracione divina Cycestren ecclesie minister humilis salutem et paratam ad sua beneplacita voluntatem cum omni reverencia et honore Serenitati vestre notum facimus per presentes quod Iohannes le Neve presbiter nostre dioecesis propter crimen sacrilegii necnon et offensam multiplicatam excommunicatus in eadem excommunicacionis sententia per quadraginta dies et amplius pertinaciter perseveravit et adhuc in eadem sordescere non formidat animo indurato claves ecclesie delusorie contempnendo Quocirca celsitudini regie humiliter supplicamus quatinus ad eius pertinaciam reprimendam districtionem quam regia majestas contra excommunicatos secundum regni vestri consuetudinem exercere consuevit contra ipsum iubeatis inferri ut quod ecclesia minus valet regalis potestas suppleat in hac parte Incolumitatem vobis conservet altissimus per tempora longa Datum apud Seleseye in crastino assumpcionis beate Marie virginis anno domini MCCLXX septimo