Charter Document - 03260233

Universis sancte matris ecclesie filiis ad quos presentes littere pervenerint Stephanus miseratione divina Cycestrens ecclesie minister humilis salutem in domino sempiternam Cum nuper inter religiosos viros priorem et conventum de Bruton Bath et Wellen dioecesis ex parte una et magistrum Martinum rectorem ecclesie de Merstone super medietate maiorum decimarum de toto dominico manerii de Merstone provenientium ex altera parte suborta fuisset materia questionis ex eo quod religiosi viri memorati asserebant decimas prefatas ad se pertinere eo pretextu quod in locum universumque ius spiritualium et temporalium que viri religiosi abbas et conventus de Troarn in regno Anglie consueverunt titulo canonice permutationis successerunt quas decimas a tempore cuius non extat memoria usque ad tempus prefate permutationis constat pleno iure pacifice possedisse prout prior et conventus predicti pro se constanter asserebant memorato rectore in contrarium asserente quod supradicte decime in parochia sua consistunt de iure communi et supradicte ecclesie et sibi nomine dicte ecclesie sue accrescere deberent eo quod permutatio que dicitur inter dictos religiosos facta quo ad spiritualia inefficax videbatur quam auctoritas dioecesana in forma iuris non vallauit tandem partes volentes materiam litium amputare ordinationi nostre diffinitioni seu decreto super premissis absolute se supposuerunt Nos autem invocata spiritus sancti gratia vocatis omnibus in forma iuris quos materia questionis supradicte contingebat assidentibus nobis viris venerabilibus et discretis magistris Simone de Lagens tunc officiale nostro Godefrido de Pecham tunc archidiacono Lewens Roberto de Wystanest et domino Iohanne de Benstede canonicis ecclesie Cycestr et aliis iurisperitis de consensu partium earundem super decimis antedictis ordinamus diffinimus et decrevimus in scriptis quod predictus Martinus rector et eius successores qui pro tempore fuerint percipiant et pacifice possideant nomine predicte ecclesie de Merstone omnes supradictas decimas inperpetuum Ordinamus etiam diffinimus et decrevimus quod predictus rector et eius successores qui pro tempore fuerint inperpetuum solvant annuatim nomine dictarum decimarum quas percipere debent auctoritate presentis ordinationis prefatis priori et conventui de Bruton vel eorum procuratori vel nuntio in ecclesia cathedrali Cicestr viginti solidos sterlingorum terminis in presenti scriptis videlicet in festo sancti Thome apostoli vi solidos et viii denarios in festo nativitatis sancti Iohannis Baptiste vi solidos et viii denarios et in festo sancti Michaelis vi solidos et viii denarios Ordinamus etiam diffinimus et decrevimus quod si predictus rector vel eius successores qui pro tempore fuerint in solutione quantitatis pecunie vel partis eiusdem a se predictis terminis et loco solvendo defecerint ex tunc prior et conventus supradicti decimas predictas ingrediantur et possideant et perpetuo iure possideant inperpetuum auctoritate presentis ordinationis contradictione predicti rectoris vel successorum suorum non obstante Et ut hec presens ordinatio diffinitio seu decretum inperpetuum inconcussa permaneat hanc scriptam sigilli nostri munimine duximus roborandam Datum et actum apud Aldingeburn die veneris ante festum sancte Fidis virginis anno domini MCCLXXVII