Charter Document - 03260195
| Charter Number: | 03260195 |
|---|---|
| Cartulary Title: | Chichester 1254-1305 Volume 23 |
| Charter Language: | Latin |
| Charter Origin: | Religious |
| Charter Type(s): | Institution |
| Date: | 1257 |
| Date type: | Internal, Calendar, Feast |
| Resource Link(s): |
|
Charter:
Omnibus Cristi fidelibus presens scriptum visuris vel audituris Iohannes divina miseratione Cicestren episcopus secundus salutem in domino sempiternam Cum in hiis que honestatis sunt et salutis ex officio nobis iniuncto teneamur vigilare presertim religiosis cupientes prospicere volentes omnem litis et calumpnie materiam impostorum amputare vacante vicaria de Boxgrave ad presentationem et ex consensu Walteri tunc prioris de Boxgrave et eiusdem loci conventus eandem vicariam sic duximus ordinandam et Philippum dictum Westhuse capellanum perpetuum in eadem ecclesia vicarium instituimus Providemus et insuper ordinamus ut quicumque fuerit vicarius in dicta ecclesia de Boxgrave constitutus percipiet singulis annis a dictis priore et conventu ad sustentationem suam in pecunia numerata quatuordecim marcas argenti et dimidiam ad tres terminos subscriptos videlicet ad Pascha sex marcas ad festum sancti Michaelis Archangeli quadraginta sex solidos et octo denarios et ad Natale domini quinque marcas et si quid eidem vicario fuerit a parochianis ex legato relictum percipiet inde tertiam partem Item percipiet decimam omnium olerum totius parochie Item habebit ex consensu dictorum prioris et conventus quod eidem vicario assignaverunt inperpetuum mansum competens quod fuit aliquando Walteri fabri et quatuor acras terre in campo qui vocatur Grantaford propiores terre quondam Vincentii filii Ricardi Quarentoris Si vero dicti prior et monachi aliquo terminorum supradictorum a solutione pecunie memorate ut supradictum est cessaverint in toto vel in parte concesserunt dicti prior et monachi quod liceat domino Cicestr qui pro tempore fuerit vel eius officiali ipsos sine strepitu iudiciali ad solutionem plene faciendam per quamcumque censuram ecclesiasticam compellere et subtractionem vel districtionem bonorum suorum mobilium et immobilium ubicumque fuerint in dioecesi Cicestren coartare Predicti vero prior et conventus de Boxgrave percipient omnes decimas maiores et minores oblationes et legata et omnes obventiones altaris et integre omnia alia dictam ecclesiam contingentia et sustinebunt omnia onera ipsius ecclesie debita et consueta excepta procuratione archidiaconi quam vicarius in sua visitatione procurabit Item si contingat aliqua extraordinaria ab ecclesia iam dicta exigenda vicarius de portione sua pro rata repensabit scilicet pro quarta parte totius ecclesie secundum antiquam estimationem eiusdem Iurabit autem quilibet erit vicarius in sua institutione dictis priori et conventui fidelitatem et quod fideliter oblationes altaris et ecclesie obventiones a parochianis perceptas dictis monachis sine difficultate quacumque persolvet et commodum et honorem dictorum prioris et monachorum prout decet procurabit In huius rei testimonium presenti littere sigillum nostrum una cum sigillo dictorum prioris et conventus de Boxgrave appendi fecimus Actum apud Aldyngborn anno gratie millesimo ducentesimo quinquagesimo septimo die veneris proxima ante festum beati Martini confessoris