Charter Document - 03250104

Universis Cristi fidelibus presens scriptum inspecturis Iocelinus Batton Ricardus Sarr Rad[ulfus] Cicestrens dei gracia episcopi salutem in domino Cum inter Ricardum abbatem Westm et eiusdem loci conventum super provisione victualium ad sustentacionem conventus minus sufficienter facta ut idem conventus asserebat questio verteretur tandem de consilio virorum discretorum ordinationi nostre unanimiter de premissis se penitus subiecerunt Nos autem ut pax et concordia inter eosdem plenius reformetur et omnis controversia super victualibus ad sustentacionem conventus imperpetuum sopiatur invocata sancti spiritus gracia ad sustentationem et victualia conventus memorati preter terras victualia redditus possessiones ab ipso Ricardo eidem conventui prius assignatas deliberatione prehabita assignavimus conventui sepedicto manerium de Echelesford cum assarto et omnibus pertinenciis suis excepto bosco quem abbas sibi et successoribus suis retinet in quo tamen per visum ballivi dicti abbatis et successorum suorum ad sustentandas karucas dicti manerii predictus conventus meremium competens accipiet Assignavimus etiam dicto conventui manerium de Grenesford cum omnibus pertinenciis suis excepto bosco qui vocatur Bradehegg quem abbas sibi et successoribus suis retinet cum Ricardo forestario et tota sequela sua et servicio suo et tota terra et excepta vestitura veteris bosci qui est ante domum fabri Assignavimus etiam ad idem sexaginta solidos de manerio de Suburg quos idem abbas dirationavit in curia domini regis contra Bartholomeum de Suburg et totum magnum gardinum cum redditibus et omnibus pertinenciis suis et cum redditibus assignatis ad stipendia servientium salvo abbati et successoribus suis prelo cum servicio servientium cum abbas de parvo gardino quod cum toto ambitu suo sibi et successoribus suis retinet siceram facere voluerit salva etiam custodia quam servientes facere debent de gardino memorato Et quia per assignationem prius ab ipso abbate factam et presentem ordinationem nostram conventui memorato sufficienter et utiliter est provisum non poterit vel debebit conventus Westm ab ipso abbate vel successoribus suis aliquid exigere ratione victualium vel bosci ad focum vel racione aliquarum operationum vel racione debitorum que debita sint alicui a conventu post primam assignationem per ipsum abbatem dicto conventui factam vel imperpetuum debebuntur Nec poterit conventus vel debebit aliquid ab ipso abbate vel successoribus suis petere imperpetuum occasione expensarum ab ipso conventu factarum a die prime assignationis vel expensarum imperpetuum faciendarum nisi forte pro ipso abbate fiant expense quas abbas racionabiliter facere teneatur salvis tamen conventui omnibus consuetudinibus racionabilibus terris redditibus possessionibus prius optentis et futuris temporibus optinendis ab alio quam abbate et successoribus suis Si vero contingat quod concessione vel auctoritate summi pontificis vel de gracia diocesanorum aliquas ecclesias in usus proprios valeant optinere medietas cedat in usus abbatum altera medietas addatur conventus portioni Warantizabit autem dictus abbas et successores sui dicto conventui omnia supradicta cum suis pertinenciis cum omni integritate contra omnes homines et sumptibus suis et expensis coram quocumque iudice seculari et ecclesiastico defendet cum aliquis versus abbatem et conventum terras clamaverit Salva sint etiam dicto abbati et successoribus suis imperpetuum honor dignitas reverentia et obedientia in omnibus debita secundum regulam sancti Benedicti Salva sit etiam dicto abbati et successoribus suis imperpetuum portio sua quam die presentis ordinationis habuit et possedit Ita tamen quod de portione sua secundum tenorem carte inter dictos abbatem et conventum super ordinationem victualium prius confecte dictus abbas et successores sui memorato conventui et aliis teneantur Ordinavimus etiam quod numquam poterunt prior et conventus per contractum mutui vel per prestacionem annue pensionis obligare nisi portionem sibi assignatam Predicta autem ordinavimus salvis per omnia domino regi et heredibus suis iuribus et dignitatibus suis Facta autem fuit presens ordinatio de consensu utriusque partis in translatione sancti Thome martiris anno ab incarnatione domini MCCXXVII pontificatus domini Gregorii pape noni successoris Honorii anno primo regni etiam domini Henrici regis filii regis Iohannis anno undecimo Et ut perpetuis temporibus robur optineat presenti scripto signa nostra una cum sigillis abbatis et conventus apposuimus