Charter Document - 03250072
| Charter Number: | 03250072 |
|---|---|
| Cartulary Title: | Chichester 1215-1253 Volume 22 |
| Charter Language: | Latin |
| Charter Origin: | Religious |
| Charter Type(s): | Ordination |
| Date: | 1227 |
| Date type: | Internal, Episcopal |
| Resource Link(s): |
|
Charter:
Omnibus Cristi fidelibus ad quos presens scriptum pervenerit Radulphus dei gratia Cicestr episcopus secundus salutem in domino Pie mentis amplectenda est devotio et tanto sinceriori fovenda est caritate quanto magis honestati ecclesie convenit et honori Eapropter pium propositum et laudabilem intentionem venerabilis viri et dilecti nostri magistri Petri de Collemedio capellani domini pape quondam canonici ecclesie sancte Marie de Hastyng considerantes de consensu et voluntate nobilis matrone Alicie comitisse Augi dicte ecclesie de Hastyng tunc temporis patrone ad instantiam et petitionem supradicti magistri factam et renuntiatione prebende sue de Howe quam habuit in ecclesia predicta per litteras suas patentes per Iohannem de Aquino nuntium suum ad hoc destinatum prehabito consilio fratrum et coepiscoporum nostrorum videlicet Bathon Lincoln Sar et aliorum virorum prudentium ita ordinavimus quod supradicta prebenda de Howe cum suis pertinentiis scilicet ecclesia de Wurtlyng et ecclesia de Nyuenefeld salva competenti et honesta vicariorum qui supradictis ecclesiis deserviant sustentatione fiant tres prebende ad quas de cetero honeste persone ad presentationem Alicie comitisse Augi vel heredum suorum a diocesano loci rationabiliter admittantur Ita videlicet quod presentati presbyteri sint ydonei sicut decet et honesti et dicte ecclesie canonici Qui etiam cum fuerint admissi de continua residentia in predicta ecclesia de Hastyng facienda prestabunt solempniter iuramentum Has autem prebendas ad ordinacionis supradicte perfectionem hac vice de honestis personis ordinavimus nolentes per hanc ordinationem nostram dicte domine comitisse Augi vel heredibus eius aliquod preiudicium de cetero generari quin ad supradictas prebendas quotiens eas vacare contigerit liceat dicte domine comitisse vel eius heredibus personas honestas scilicet sacerdotes secundum ordinationem supradictam presentare Volumus etiam quod in supradicta ecclesia de Hastyng singulis annis supradicti magistri anniversarius dies solempniter celebretur Ita quod dicti tres canonici pro equis portionibus duos solidos annuatim persolvant et eosdem canonicis et vicariis qui exequiis die anniversarii supradicti interfuerint per equales portiones distribuant Hanc ergo ordinationem iuste et canonice [ad] honorem dei et ecclesie sancte Marie de Hastyng a nobis factam omnibus presens scriptum inspecturis perpetuo valiturum dignum duximus litteris presentibus innotescendum auctoritate beatorum Petri et Pauli et omnium sanctorum et martyrum sub pena anathematis prohibentes ne quis in posterum contra hanc nostram constitutionem venire presumat vel eidem ausu temerario contradicat Actum anno incarnationis dominice millesimo CCXXVII mense Maii