Charter Document - 03250029
| Charter Number: | 03250029 |
|---|---|
| Cartulary Title: | Chichester 1215-1253 Volume 22 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1222 |
| Date type: | Internal, Calendar, Episcopal |
| Resource Link(s): |
|
Charter:
Omnibus sancte matris ecclesie filiis ad quos presens scriptum pervenerit Ranulfus divina miseratione Cycestr ecclesie minister humilis salutem in domino Ad universitatis vestre volumus notitiam pervenire quod cum post decessum Huberti Hosati rectoris ecclesie de Rogat inter Henricum Hosatum militem ex una parte et Robertum abbatem et canonicos de Dureford ex altera super dicta ecclesia de Rogat coram nobis questio verteretur proponente domino Henrico presentatum ab ipso clericum ut pote ad ecclesiam vacantem in qua ius se dicebat habere patronatus ad presentationem ipsius debere admitti et institui contendentibus ex adverso dictis abbate et canonicis de Dureford sepedictam ecclesiam per Henricum Hosatum patrem prefati Henrici ipsis fuisse concessam et concessionem ipsius per episcopos Cycestr bone memorie Seffridum Simonem et Ricardum necnon et Hubertum Cantuar archiepiscopum quorum omnium autenticas exhibebant scripturas quantum ad ipsos pertinebat fuisse confirmatam et propter hoc presentatum a predicto milite admitti de iure nec posse nec debere Tandem de prenominata ecclesia et iure suo in ipsa nostre se ordinationi supposuerunt fidem interponere promittentes quod inposterum fideliter et sine fraude observabunt quod super hiis providerimus statuendum Nos igitur circumstantiis que negotium contingebant et memoratis autenticis quantum nobis datum fuit desuper sollicite ac diligenter inspectis ordinavimus in hunc modum videlicet quod sepedictus Henricus et heredes sui qui pro tempore fuerint presentabunt vicarium capellanum scilicet qui ministrabit in propria persona in eadem ecclesia et habebit ad sui sustentationem totam liberam terram ecclesie omnes obventiones altaris et minutas decimas et omnia ad ecclesiam pertinentes preter bladum decimarum de quo percipiet unam decimam decime et sustinebit omnia onera episcopalia ecclesiam contingentia Memorati vero abbas et canonici de Durford percipient totum bladum decimarum preter decimam decime quam habebit vicarius ut predictum est et solvent viginti quinque solidos annuos monachis Sagiens quos de eadem ecclesia nomine beneficii annuatim percipere consueverunt Ut autem hec nostra ordinatio rata imposterum perseveret nec alteruter partium valeat cum de earum consensu et voluntate processerit mutata forte voluntate convelli eam presentis scripti testimonio et sigilli nostri appositione communimus ac auctoritate episcopali confirmamus Hiis testibus magistro Laurentio Godefrido et Ernisio canonicis Cicestr Henrico Hosato et Roberto Fesseler militibus Waltero decano de Lynces magistro Iohanne persona de Clympyng magistro Egidio persona et Clemente vicario de Hertyng Nicolao vicario de Rogate Willelmo de Burton Rogero de Helcham clerico Rogero de Warham et aliis Acta apud Aldyngburn septimo id Aprilis pontificatus nostri anno quinto