Charter Document - 03243049

Universis sancte matris ecclesie filiis ad quos presentes littere pervenerint Thomas Dei gratia Norwicensis episcopus salutem in Domino sempiternam Cum a nobis petitur quod iustum est et honestum tam vigor equitatis quam ordo exigit rationis ut illud per sollicitudinem officii nostri ad debitum perducatur effectum Hinc est quod cum nuper inter religiosos viros abbatem et conventum sancti Iohannis Colecestr Londoniensis diocesis actores ex parte una et dominum Petrum rectorem ecclesie de Ereswell nostri diocesis reum ex altera super duabus partibus omnium et singularum decimarum tam maiorum quam minorum provenientium de dominicis terris et tenementis quondam Radulphi de Rofa in Ereswell et Cukelesword ac super omnibus decimis molendinorum de Ereswell et de Berton materia questionis et altercationis antique contentionis et litis coram nobis loci diocesano per varios strepitus iudiciales et causarum amfractus non sine magnis laboribus partium et expensis quasi immortaliter fuisset diuturnis temporibus agitata ac demum partes predicte pro iure suo convenientiam [petentes] quam etiam ecclesiarum suarum predictarum quantum in ipsis fuit propter bonum pacis et huius litis dispendia evitandum super possessione vel quasi et etiam iure percipiendi dictas decimas infuturum pure sponte et absolute alte et basse plene se nostre submisissent ordinationi laudo et arbitrio prout in litteris submissionis dictarum partium plenius continetur nos dictas submissiones partium predictarum seu compromissum causa dirimendarum et abbreviandarum litium admittentes ordinaria potestate nobis in hac parte nichilominus reservata cupientes ad maiorem nostre consciende serenationem tam super possessione seu quasi et titulo seu iure percipiendi dictas decimas ex parte dictorum religiosorum allegato fieri certiores munimenta eorundem quibus loco pro bonis iuris et tituli uti intendebant nobis fecimus exhiberi ac super eorum possessiones testes in forma iuris admitti et examinari quibus publicatis inspectis diligenter et examinatis licet ex ipsorum tenore ac testium predictorum depositione dictos religiosos iure speciali et ab antiquo videlicet per tempus sexaginta annorum et amplius tam super iure quam possessione dictarum decimarum sufficienter fore munitos luculenter declaretur virtute cuius iuris seu tituli dictas decimas ab antiquo perceperint et adhuc possideant in presenti prout per inquisitionem duodecim hominum iuratorum per decanum loci eiusdem de mandato nostro super dictarum decimarum estimatione et valore ac ceteris circumstantiis hoc negotium contingentibus rite factam plenius est compertum ne tamen plus personarum compromittentium quam dictarum ecclesiarum favisse indempnitatibus videamur prefatos religiosos in persona sui procuratoris mandatum sufficiens super hoc exhibentis et dictum rectorem personaliter comparentem iuramento corporaliter prestito oneravimus in premissis quod absque omni collusione et fraudis commisso ac propter utilitatem utriusque ecclesie supradicte nostrum super iudicium arbitrium seu decretum valiturum perpetuo instanter requirebunt compertoque per inquisitionem duodecim hominum fidedignorum ac iuratorum vicinie de mandato nostro speciali ut premittitur in hac parte factam super vera rei estimatione qui harum decimarum notitiam habebant de quibus agitur pleniorem quod super dictis decimis amicabilis compositio esset utrique parti profutura et utilis prout dicti vicini super hiis iurati firmiter asserebant Ex quibus omnibus et singulis nos luculentius informati rimatis et intellectis ipsius negotii circumstantiis ponderatisque prout nobis est possibile ponderandis pensatisque utriusque ecclesie supradicte et ipsis presidentium utilitatibus et comodis equo libramine in statera litibus finem imponi cupientes per viam amicabilis compositionis et auctoritate pontificalis officii ordinamus decernimus et finaliter diffinimus tam ex arbitraria potestate quam ex ordinaria iurisdictione procedentes ut ex hac nostra provisione ordinatione pronuntiatione arbitrio seu sententia rectores ecclesie de Eres well predicte qui pro tempore fuerint decimas quascumque de dictis terris et tenementis ac molendinis predictis qualitercumque provenientes integre percipiant et quiete non obstante quod dicte decime speciali iure dictis religiosis sint debite et consuete ac sufficienti sexaginta annorum tempore et amplius legittime prescripte In recompensationem vero huius perceptionis et emolumenti predictam ecclesiam de Eriswell et ipsius rectores quoscumque in sexaginta solidis argenti annuis pro eo quod he decime iusto pretio pro tanta pecunie summa iuxta inquisitionem duodecim hominum fidedignorum et iuratorum vicinie de mandato nostro speciali ut premittitur super hoc factam annis communibus estimantur ex predictis omnibus et singulis nostram conscientiam informantes censuales fore sententialiter decernimus et diffinimus et ad dictam pecunie summam dictis religiosis annuatim in festo purificationis beate Marie et in festo nativitatis beati Iohannis Baptiste pro equali portione in eorum monasterio apud Colecestr per nuntium rectoris ecclesie de Ereswell predicte qui pro tempore fuerit persolvendam auctoritate pontificalis officii ac potestate arbitraria finaliter condempnamus Et si rectores ecclesie memorate qui pro tempore fuerint seu fuerit eorum aliquis huic ordinationi nostre parere contempserint vel contempserit eorum aliquis vel in solutione pecunie de qua supra tangitur temporibus seu loco vel modo prestititis defecerint seu defecerit eorum aliquis in eos et in eum sic deficientes ex nunc et ex tunc maioris excommunicationis sententiam proferimus in hiis scriptis Adicimus etiam huic pene ut quotiens in dicte pecunie prestatione a quovis rectorum dicte ecclesie cessetur totiens quadraginta solidi fabrice ecclesie cathedralis sancte Trinitatis Norwici applicandi etiam sine strepitu iudiciali nostra ordinatione nichilominus in hac parte rata manente a rectore reluctante sive subterfugiente exsolvantur premissorum omnium ut in suis iuribus observentur perpetuo nobis et successoribus nostris coherceonem ecclesiasticam reservantes In quorum omnium et singulorum testimonium premissorum ad perpetuam rei memoriam has litteras nostras in modum cyrograffi confectas sigilli nostri impressione fecimus communiri Dat apud Gipeswic viii idus Maii anno Domini millesimo CC vicesimo octavo pontificatus nostri anno secundo