Charter Document - 03240125
| Charter Number: | 03240125 |
|---|---|
| Cartulary Title: | Norwich 1215-1243 Volume 21 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1241 |
| Date type: | Internal, Calendar, Episcopal |
| Resource Link(s): |
|
Charter:
Omnibus Cristi fidelibus ad quos presens scriptum pervenerit Willelmus de Ralegh Dei gratia episcopus Norwicensis salutem in Domino Grata Deo et hominibus accepta religio exigit et requirit ut que religiosorum usibus conceduntur cum huiusmodi concessionibus pietas suffragatur pontificalis auctoritatis munimine roborentur Ad universorum igitur notitiam volumus pervenire nos divine pietatis optentu et sancte zelo religionis presenti carta nostra confirmasse religiosis viris abbati et conventui de Becco antiquas pensiones et debitas et etiam decimas omnes quas ex pia predecessorum nostrorum largitione et caritativa fidelium collatione iuste et canonice hactenus in nostra diocesi possederunt salva in omnibus sancte Norwicensis ecclesie reverentia et dignitate Quod ut perpetuam optineat firmitatem presenti scripto sigillum nostrum duximus apponendum Dat London per manum Philippi de Sideham capellani nostri xvi kalendas Februarii pontificatus nostri anno secundo