Charter Document - 03240091

Universis has litteras visuris vel audituris Thomas Dei gratia Norwicensis episcopus salutem in Domino Licet ex officii nostri debito omnium ecclesiarum nostre diocesis curam gerere teneamur specialiter tamen ad honorem et profectum Norwicensis ecclesie summo opere nos decet intendere que in agendis suis tanto nos debet invenire favorabiles et benignos quanto speciali privilegio dilectionis gratam illi tenemur pre aliis facere specialem que nobis pre aliis specialius est commissa Sane cum bone memorie I predecessor noster dilectis filiis nostris monachis de Norwico ecclesiam de Wictone sine omni subtractione in proprios usus habendam intuitu caritatis concessisset nichil sibi nec successoribus suis excepto iure episcopali retinendo et parrochiali P bone memorie antecessor noster contra predictam concessionem et confirmationem veniendo ibidem vicariam secundum facultates ipsius ecclesie superfluam taxari fecit in ipsorum monachorum preiudicium et gravamen Unde cum ad nos spectare dinoscatur minus iuste distracta revocare atque indempnitati ecclesie nostre previdere caritatis intuitu concessimus ac present carta nostra confirmavimus predictis monachis nostris de Norwico quod singuli vicarii per dictorum monachorum liberam presentationem ac nostram et successorum nostrorum institutionem in dicta ecclesia pro tempore preficiendi dictam vicariam secundum taxationem prehibitam habeant et possideant solvendo singulis annis celerario dicte domus cuius officio dicta ecclesia appropriatur centum solidos ad duos sinodos Norwicenses et in eisdem synodis sine omni subtractione vel diminutione et hec omnia concessimus salvis dictis monachis presentatione predicta et nobis et successoribus nostris iure pontificali et parochiali In cuius rei testimonium has literas fieri fecimus et sigillo nostro muniri Dat apud Norwicum in crastino cinerum pontificatus nostri anno septimo