Charter Document - 03240001
| Charter Number: | 03240001 |
|---|---|
| Cartulary Title: | Norwich 1215-1243 Volume 21 |
| Charter Language: | Latin |
| Charter Origin: | Religious |
| Charter Type(s): | Settlement |
| Date: | 1224 |
| Date type: | Internal, A.D., Calendar |
| Resource Link(s): |
|
Charter:
Pandulphus Dei gratia episcopus Norwicensis universis presentes litteras inspecturis salutem in Domino Notum sit universitati vestre quod cum inter dilectos filios abbatem et conventum de Bello ex una parte et Willelmum de Redhenfeld archidiaconum Richemund ex altera super ecclesia de Elesham questio fuisset diutius agitata et ab utraque parte super ea processum tandem mutuo volentes parcere laboribus et expensis super tota causa ipsa provisioni nostre se absolute et libere supposuerunt in manibus nostris ab utraque parte corporali prestito iuramento quod arbitrio et provisioni nostre super hoc sine aliqua reclamatione parerent et ad hoc firmius observandum pena ccc librarum si committetur in pios usus convertendarum de assensu partium fuit adiecta ita ut absque contradictione partium si aliqua earum ab arbitrio et provisione nostra aliquatenus resiliret per beneficia que habent in episcopatu nostro absque contradictione ipsorum eos ad arbitrium observandum plenius cogere debemus Nos igitur ipsius cause meritis plenius consideratis et solum Deum habentes pre oculis in hac parte de consilio prudentium virorum archidiacono ipsi perpetuum silentium imposuimus super ecclesia memorata sub debito prestiti iuramenti iniungentes eidem ut monasterio de Bello super ecclesia predicta nullam de cetero moveat questionem et renuntiet omni liti et actioni et quicquid iuris se credidit in ea posse habere et super hoc litteras suas patentes abbati et conventui de Bello concedat et quia gratiam venerabilis patris W archiepiscopi Eboracensis fratris nostri et devotionem ipsius archidiaconi abbati et conventui de Bello credimus fructuosam eisdem dedimus in mandatis ut ipsi archidiacono in redditibus duodecim libras sive in feodo seculari sive in ecclesiastico beneficio debeant providere et eidem suis patentibus litteris confirmare ita tamen quod beneficium ipsum post mortem archidiaconi sine diminutione ad monasterium de Bello libere revertatur omni sibi sublata potestate beneficium ipsum ab iurisdictione monasterii alienandi De quibus omnibus ne possit in posterum dubitari has proinde litteras fieri fecimus et sigillo nostro muniri Actum apud Teford in domo canonicorum sancti Sepulchri xiii kalendas Octobris anno Domini mccxxiiii Hiis testibus Ada de Buttel et sancti Sepulchri de Theford prioribus magistro A archidiacono Sudbir officiali nostro Willelmo capellano Landone Rustico Laurentio Petro de Iuli et Petro de Luca clericis nostris
Source (click image below to view full size)
