Charter Document - 03231011

Si mihi presto esset facundia que Tullianum redoleret eloquium nequaquam posset dulcissime pater sufficere ad exprimendam beneficii quantitatem quam innate bonitatis vestre motu proprio mihi nuper exhibuistis Ego enim iam per annum et eo amplius in carcere positus quo mendax me detrudi fecerat invidia in tenebris straverat lectulum meum et panem meum in suspiriis manducabam potum temperans in lacrimis donec manus consolationis vestre eductum de lacu miserie et inferno inferiori regioni me restituit viventium et aure superiori Iam purpuratos ut prius non erubesco nec potentium presentiam declino Sed qui hactenus ad Dominum meum oculos levare non audebam pristine redditus libertati labia audacter aperio ad exorandum non solum pro me verum et pro his quos diligo maxime cum tales sint qui vita et eruditione inter precipuos numerantur Vir clarissimus dominus Londoniensis ab exordio promotionis sue etiam apud eos qui foris sunt semper honorabilis habitus est et suave olentis opinionis vir utique et nature bonis abundans et ingenii facultatibus quorum finibus minime contentus diuturno ea religionis et districto cultu excoluit Hunc lacessivit invidia integritatem eius lacerare temptans que supra firmam petram fundata non poterit sentire defectum Ut enim de his aliqua tangamus que ipsi ab emulis imposita sunt pro certo domine sciatis quod dum adhuc viveret dominus Cantuariensis in Anglia me presente dominum regem sepe rogavit ut iuxta mandati vestri formam ad pacem animum suum inclinaret Apud Cadomum vero cum ex his que dominus rex a multis audierat indignatio eius adversus iam dictum archiepiscopum plurimum recruduit set quantum potuit ad leniendum motum illum vehementem etiam cum lacrimis adhibuit diligentiam Cuius domine si placet annos senio graves attendite corporis debilitatem respicite quam non solum etas induxit sed et assidue vigilie et crebra ieiunia Solutisque vinculis quibus tenetur eum liberum reddite ut una nobiscum onera possit ecclesie sustinere