Charter Document - 03230140

Rogerus Dei gratia Eboracensis archiepiscopus et apostolice sedis legatus venerabili fratri H[ugoni] Dei gratia Dun[elmensi] episcopo et dilectis filiis R[oberto] decano et Willelmo cantori et universo capitulo Eboracensi omnibusque canonicis sancte Marie de Sudewelle sanctique Wilfridi de Ripun sanctique Iohannis de Beverlei abbatibus prioribus clero et universo populo per Eboracensem provinciam constitutis salutem et gratiam Non ignorat dilectio vestra quanta pro dignitate ecclesie nostre hac tempestate sustinuerim in qua tantum invidie mandari adversum me licuit ut vix aliquis locus veritati relinqueretur Familiare est omnibus iniquis quotiens nancisci possunt occasionem maledictis eos quibus invident inurere et venenatis verborum iaculis figere innocentes Fecerunt hoc qui iam pridem sederunt michi in insidiis Et quidem primo paraverunt laqueum suspensionis quo dominus papa plus eorum falsas suggestiones quam iuris ordinem secutus me innodavit Deinde ne quoquomodo solvi posset iniquitatem iniquitati addentes hinc maximorum virorum libellos arte multiplici sicut iam a pluribus retro annis instructi fuerant conquirebant inde peregrinorum et qui me nunquam viderant multitudinem subornabant ut ea que non noverant mentientes apud summum pontificem et curiam Romanam quocumque modo famam onerarent Absens eram et qui ex parte mea in curia pauci tante multitudini vix resistere poterant tam exquisitis pressi mendaciis maxime cum quidam solo habitu religiosi videntes illos prosperari in iniquitatibus suis cum illis currebant et neglecto Dei timore ad eversionem dignitatis ecclesie nostre una cum meretricibus suis quas secum duxerant ne quis sexus persecutioni mee deesset multa dixerunt Hi omnes in unum convenientes proposuerunt in cordibus suis gigantes imitari parietem ex maximis quasi quibusdam lapidibus et multis mendaciis fictis ad tempus suspiriis et gemitibus non solum domos sed et plateas replentes diurno et nocturno ululatu eundemque ipsum parietem tanquam quodam indissolubili bitumine vim nature facientes simulatis lacrimis linierunt sperantes hoc modo celum claudere se posse et veritatem perpetuo carceri deputare Quid plura Idem Pharao illorum ille spiritualis cuius ipsi membra sunt in tali equitatu incedere videbatur cum corona et ego misere cophini servituti deputatus respiciebam ad auxilium hominum et non erat cuti enim mee consumptis canibus os meum adheserat Levavi ergo ad celum oculos et in angustia spiritus mei ad Deum clamavi et intercedentibus meritis et orationibus vestris exaudivit me pro sua reverentia Qui malleo bonitatis sue innate predicto pariete confracto et in nichilum redacto fugientibus Babiloniis que clausa tenebatur veritatem eduxit et squalore carcerali deterso liberam in publicum exire precepit Que simul ac sue reddita est libertati ad me velociter advolavit et in presentia dominorum Rotrodi Rothomagensis et eorum quos episcopus Ambianensis vice sua delegaverat quibus negotium meum a domino papa commissum erat necnon et episcopi Ebroicensis multorumque religiosorum tam abbatum quam priorum a dextris michi luce liquidior astat Cuius faciem gravem et fulgentem predicti archiepiscopus et viri religiosi a domino Ambianensi destinati intuentes gavisi sunt gaudio magno valde et nullam moram sustinentes iuxta formam quam eis dominus papa prescripserat incontinenti me a suspensione qua tenebar absolverunt universis qui aderant benedicentibus Dominum qui superbos humiliat qui sapientes in astutia sua comprehendit qui de misericordia sua presumentes liberat et vinctos educit in fortitudine Ipsi gloria et nunc et per immortalia secula seculorum Amen Veniam autem ad vos Deo volente in proximo ut gaudium meum in vobis impleatur quos ego ultra quam dici possit videre desidero Benedictio Dei Patris et Filii et Spiritus Sancti descendat super vos pro nobis orantes Acta sunt hec secunda feria post dominicam qua cantatur Gaudete die festo sancte Lucie apud Albamarliam