Charter Document - 03230106

Rog[erus] Dei gratia Ebor[acensis] archiepiscopus R[oberto] decano et capitulo sancti Petri et omnibus parochianis suis salutem et Dei benedictionem Ad episcopalem spectat sollicitudinem terras et possessiones ecclesiasticas et precipue religiosis domibus collatas pastorali cura defendere et auctoritatis sue pagina ad perpetuam stabilitatem roborare Hac itaque consideratione monasterio sancti Petri et sancte Hylde de Wyteby et monachis ibidem Deo servientibus ecclesiam sancte Marie eiusdem ville cum pertinentiis suis et ecclesiam sancte Marie de Hakenes cum pertinentiis suis et ecclesiam de Etona cum pertinentiis suis in proprios usus monasterii et monachorum in perpetuam elemosinam confirmamus salvo iure Eboracensis ecclesie et episcopalibus consuetudinibus excepto quod predicta ecclesia sancte Marie de Wyteby quieta est de sinodo Post decessum vero Reinerii clerici sui ecclesiam de Engelby in proprios usus monasterii et monachorum similiter concedimus et confirmamus Preterea vero confirmamus predicte ecclesie sancti Petri et sancte Hilde de Wytebi duas partes decime bladi de totis dominiis Willelmi de Perci et Alani de Perci filii eius et Willelmi de Perci filii Alani de Perci undecumque culta vel seminata fuerint tempore eorum vel heredum eorum sicut habetur in cartis eorum scilicet de Uplium de Wiltona de Samara de Nafertona et de Stachestona similiter in Boitorp ex dono Hugonis de Boitorp similiter in Wicheham ex dono Pagani de Wycheham Conventionem vero que inter abbatem de Wyteby et abbatem de Evesham assensu conventus utriusque monasterii super ecclesia de Huntintona facta est nos ratam habemus illamque presenti carta confirmamus sicut in carta abbatis et conventus de Evesham continetur Hiis testibus Clemente abbate de Eboraco Greg[orio] priore de Bridlingt[on] Iohanne archidiacono et aliis