Charter Document - 03220392

Universis Cristi fidelibus ad quos presens scriptum pervenerit Ricardus Sarreb Ioscelinus Bath dei gratia episcopi Ricardus prior de Dunstapl Robertus Huntingdonie Iohannes Bedefordie archidiaconi et Ulianus de Chenneduit clericus salutem in domino Cum inter virum venerabilem Lincoln[iensem] episcopum Hugonem secundum et eiusdem loci capitulum ex una parte et Willelmum abbatem Westmon[asterii] et eiusdem loci conventum ex altera super ecclesia de Wathamstede quam dicti abbas et monachi in usus proprios vendicabant coram iudicibus a sede apostolica delegatis videlicet de Sancto Albano et de Radinges abbatibus et priore de Dunstapele questio verteretur tandem post multas altercationes dictis iudicibus partes ad pacem et concordiam crebro et instanter exhortantibus utraque pars de auctoritate iudicum predictorum spontanea voluntate prehabita deliberatione super dicta ecclesia cum pertinentiis suis que tunc vacabat ordinationi nostre se submisit per litteras utriusque prelati et utriusque capituli pure et absolute se obligans ordinationem nos tram se ratam et gratam habituram Nos igitur tam ad instantiam partium quam ad exhortationem iudicum predictorum inducti volentes utriusque ecclesie paci tranquillitati et indempnitati providere invocata spiritus sancti gratia super dicta ecclesia taliter duximus ordinandum Videlicet quod mesuagium quod est iuxta capellam sancti Nicholai cum tota curia quod prius fuit persone et medietas decime garbarum provenientium ex tota parochia de Wathammestede cedat in perpetuum beneficium monasterio de Westmon[asterio] et insuper quedam portio garbarum alterius medietatis usque ad estimationem sex marcarum que omnia deputavimus in usus hospitalitatis et elemosine expendenda per manus hospitarii ad hoc officium per abbatem et priorem et seniores conventus eligendi qui de acceptis et expensis bis in anno coram septem senioribus ad minus fideliter reddat rationem Volumus tamen quod idem hospitarius in tribus marcis annuis respondeat sacriste quas prius de predicta ecclesia ad luminaria ecclesie de Westmon[asterio] sacrista percipere solebat Gravamina vero Lincoln[iensis] ecclesie diligentius attendentes et communi consideratione compensare volentes ordinavimus quod ius patronatus totius predicte ecclesie ad dictum episcopum Linc[olniensem] et successores eius in perpetuum pertineat et quod rector eiusdem ecclesie qui per eos pro tempore fuerit institutus habeat dictam ecclesiam cum mesuagio et tota curia que fuerunt dictorum abbatis et conventus tempore huius ordinationis cum toto altalagio et residua parte decimarum de garbis et terra ecclesie et homagiis et redditibus et omnibus aliis ad ecclesiam ipsam pertinentibus et sustineat omnia honera episcopalia et alia que sunt ordinaria et consueta In extraordinariis autem oneribus omnibus utraque pars pro sua respondeat portione iurisdictione tam episcopi quam archidiaconi et officialium suorum circa utramque portionem in pristino statu integra et illibata permanente Et ne ex hac concordia oriatur materia discordie ita duximus portiones garbarum declarandas quod per quatuor clericos et quatuor laicos communiter electos et iuramento astrictos aliquod territorium specialiter sequestretur cuius decima secundum communes annos valeat duodecim marcas cuius medietas cedat monachis pro sua parte et altera medietas pro superadditione sex marcarum supradicta Quia vero hec nostra ordinatio coram partibus recitata ab utraque parte fuit gratanter admissa eam providimus sigillis utriusque partis confirmandam et sigillorum nostrorum appositione roborandam Actum London in capella beate Katerine apud Westmon[asterium] in festo sancte Agnetis virginis proximo postquam translatus est beatus martir Thomas