Charter Document - 03220332

Omnibus Cristi fidelibus ad quos presens scriptum pervenerit Richardus dei permissione Sar ecclesie minister humilis et eiusdem loci capitulum salutem in domino Scire volumus universos quod nos inspectis cartis pie recordationis Huberti quondam Sar episcopi necnon et felicis memorie Herberti Sar episcopi predecessoris nostri Rotrodi quoque illustris viri comitis Perticensis et G comitis filii sui intuitu dei et consideratione honestatis et paupertatis domus dei de Nogento Rotrodi dedimus et concessimus et auctoritate episcopali in proprios usus confirmavimus prenominate domui et fratribus in ea degentibus ad eorum et pauperum Cristi sustentationem ecclesias de Audiburn et Ganberg habendas et tenendas cum omnibus pertinentiis et proventibus suis libertatibus et liberis consuetudinibus statuentes ut quicumque pro tempore dicte domus prior fuerit dictarum ecclesiarum de Audiburn et Ganberg persona censeatur et curam habeat animarum ad cuius de fratrum suorum assensu presentationem nos et successores nostri viros idoneos ad vicarias dictarum de Audiburn et Ganberg ecclesiarum in subscripta forma taxatas admittemus et pro officii nostri debito cum vacaverint instituemus Ad quorum sustentationem cum magna deliberatione communicato bonorum virorum consilio inferius notata in perpetuum duximus assignanda Vicarius igitur de Audiburn et successores sui qui pro tempore fuerint habebunt unam virgatam terre cum pertinentiis suis omnimodas quoque oblationes et obventiones tam altaris quam cimiterii confessiones quoque in Quadragesima et extra Quadragesimam percipient insuper omnia legata ecclesie altar et capellani et omnes minutas decimas videlicet vitulorum pullorum porcellorum agnorum lane et lini casei et lactis et consimilium et si quid residuum fuerit denariorum beati Petri Percipient etiam decimam bladi de tota terra ad ecclesiam pertinente et de omnibus terris quas tenentes ecclesie tenent de ecclesia et omnes minutas decimas tam de dominico prioris quam de tenentibus de ecclesia preterea decimam septem virgatarum terre que sunt biwestewd et nichilominus omnes minutas decimas totius parrochie sicut suprascriptum est Percipient etiam singulis annis in perpetuum in augmentum sue vicarie ad honera eiusdem melius supportanda quadraginta solidos ad quatuor terminos subscriptos videlicet in festo beati Michaelis decem solidos ad Natale decem solidos ad Pascha decem solidos et in festo beati Iohannis Baptiste decem solidos ille vero qui ad vicariam de Ganberg fuerit presentatus et per nos et successores nostros canonice institutus habebit unam virgatam terre cum pertinentiis suis et omnes obventiones omnesque minutas decimas totius parrochie sicut suprascriptum est de vicario de Audibum Habebit etiam totam decimam Stephani de Erdescot et hominum suorum et totam decimam Sewalli militis de dominico suo et totam decimam de terra ecclesie et de omnibus terris quas tenentes ecclesie tenent de ecclesia et omnes minutas decimas tam de dominico prioris quam de tenentibus de ecclesia salvis priori predicte domus de Nogento decimis terrarum quas post confectionem istius carte adquiret et salva decima terre quam defunctus Hugo de Tabar miles eis elemosinarie contulit Et nichilominus percipiet dictus vicarius de Ganberg viginti solidos a supradicto priore vel e ius procuratore ad quatuor terminos subscriptos videlicet in festo beati Michaelis quinque solidos ad Natale quinque solidos ad Pascha quinque solidos in festo sancti Iohannis Baptiste quinque solidos Volumus autem et episcopali auctoritate statuimus quod dictarum ecclesiarum vicarii qui pro tempore fuerint personaliter in ipsis resideant in ordine sacerdotii ministrantes ita quod tam ecclesia de Audibum quam ecclesia de Ganberg per duos capellanos idoneos et unum dyaconum in perpetuum officietur Sustinebunt autem dicti vicarii debitas et statutas consuetudines episcopales Cetera vero onera videlicet procurat[ionem] arch[idiaconi] et reparationem librorum et ornamentorum dictarum ecclesiarum similiter sustinebunt et luminaria invenient Prior vero de Nogento ad reedificationem et conservationem cancellorum predictarum ecclesiarum tenebitur ita quod habebit unum virum honestum de fratribus domus sue apud Audibum vel apud Ganberg residentem nisi de licentia et gratia nostra vel successorum nostrorum ad profectum ipsorum aliter ordinetur In ceteris vero omnibus honeribus que ecclesias prescriptas variis ex causis contingere possunt sicut vicarii vicinarum ecclesiarum ita pro rata vicarie sue respondebunt dicti vicarii de Audibum et Ganberg et prior vel procurator domus dei de Nogento plenarie respondeat pro personatu reservata nobis et successoribus nostris tam in vicariis quam personis qui pro tempore fuerint omnimoda et plenaria episcopali iurisdictione Et ut hec nostra donatio et concessio perpetuum firmitatis robur optineat eam presentis scripti testimonio et sigilli nostri ac capituli Sar munimine roboravimus salvis in omnibus iure auctoritate et dignitate Sar ecclesie et nostra et successorum nostrorum Dat per manum Valentini clerici nostri apud Sar kl Octobris pontificatus nostri anno undecimo