Charter Document - 03220321

Universis sancte matris ecclesie filiis presens scriptum inspecturis vel audituris Ricardus divina permissione episcopus Saresbir et eiusdem loci capitulum salutem in domino Cum ea que ad honorem dei pacem et tranquillitatem sancte geruntur ecclesie iustum sit firma consistere et suis radicibus firma et inconvulsa permanere universitati vestre notum facimus quod cum inter nos ex una parte et Walterum abbatem et conventum Malmesbir monasterii ex alia coram Adam et Iordano de Waverleye et de Dereford abbatibus iudicibus delegatis auctoritate litterarum domini pape Honorii tertii super subiectione dicti monasterii tam in temporalibus quam in spiritualibus sicut in dictorum iudicum autentico continetur questio verteretur post plures altercationes ad ammonitionem iudicum qui monitionem et mandatum venerabilis patris Pandulfi Northwyc electi apostolice sedis legati necnon et illustris Anglorum regis Henrici filii regis Iohannis super pace reformanda inter partes receperunt quorum monitionibus obtemperantes et pacem quantum in nobis est cum omnibus habere cupientes cum dictis abbate et conventu de provisione iudicum super predictis pacem inivimus concedentes eis quantum in nobis est quod monasterium Malmesbir ab omni subiectione nostra et successorum nostrorum tam in temporalibus quam in spiritualibus infra ambitum cimiterii et dicti monasterii sit sicut nobis constat esse exemptum per inspectionem privilegiorum suorum Romanorum videlicet pontificum Sergii Innocentii secundi Alexandri tertii In quibus ista continentur quod monasterium Malmesbir quod in honore beatorum apostolorum Petri et Pauli fundatum fuisse et nunc in honore beate dei genitricis semperque virginis Marie et sancti Aldhelmi reedificatum esse dinoscitur sub eiusdem apostolorum principis et sancte Romane ecclesie cuius iuris existit tutela et proprietate tantum manere censemus et presentis scripti privilegio communimus crisma etiam oleum sanctum consecrationes altarium seu basilicarum ordinationes monachorum vel clericorum qui ad sacros ordines sunt promovendi benedictionem abbatis [] ecclesiastica sacramenta a diocesano suscipietis episcopo si quidam catholicus fuerit et gratiam atque communionem sedis apostolice habuerit et ea gratis et absque ulla pravitate vobis voluerit exhibere alioquin liceat vobis catholicum quemcumque malueritis adire antistitem qui nimirum nostra fultus auctoritate quod postulatur indulgeat prohibemus etiam ut nulli episcopo liceat in eodem monasterio cathedram statuere aut missas publicas celebrare nisi ab abbate et fratribus fuerit evocatus Continetur etiam in privilegiis eorundem quod si aliquod scriptum vel privilegium contra hanc libertatem a Sergio Innocentio secundo et Alexandro tertio monasterio memorato concessam et ab eis confirmatam aliquando apparuerit eidem libertati nulla ratione preiudicet ad indicium autem huius a sede apostolica percepte libertatis unciam auri nobis nostrisque successoribus annis singulis persolvetis Concedimus etiam et nos quantum in nobis est quod prefatis libertatibus et dignitatibus gaudeant abbas et conventus dicti monasterii quiete et pacifice libere ab omni molestia et impetitione a nobis vel a successoribus nostris eisdem inferendis non obstantibus privilegiis seu confirmationibus quorumcumque sive Romanorum pontificum sive regum sive aliorum Saresbir ecclesie seu episcopo vel eiusdem loci capitulo concessis scil collatis in quibus mentio habeatur de monasterio vel abbatia Malmesbir que ad lesionem seu preiudicium predictarum libertatum vel dignitatum possent retorqueri Salve autem sint nobis et successoribus nostris per Saresbir diocesim in omnibus ad dictum monasterium pertinentibus extra ambitum monasterii et cimiterii Malmesbir lex et iurisdictio diocesana Ne igitur illa vetus querela illa antiqua controversia que inter ecclesiam Saresbir et monasterium Malmesbir super subiectione eiusdem monasterii coram prefatis iudicibus suscitata et provisione iudiciali eorundem sopita litigantium improbitate suscitetur et quod auctoritate dictorum iudicum utiliter ad tranquillitatem tam ecclesie Saresbir quam monasterii Malmesbir dinoscitur ordinatum iterum devocetur in dubium nos ea que coram memoratis iudicibus auctoritate apostolica de consensu partium gesta sunt rata et grata habentes ad plenam in posterum securitatem hanc presentem cartam dictis abbati et conventui de Malmesbir unanimi assensu et voluntate confecimus quam sigillorum nostrorum appositione corroboravimus Hiis testibus Willelmo de Waude precentore Sar magistro Hugone de Gaihurst cancellario Abrah[am] de Wint[onia] thesaurario magistro Roberto de Bingeham magistro Luca magistro Willelmo de Merton canonicis Sar magistro Adam de Ebelesburne Thoma de Columbarum clerico magistro Iohanne episcopo Henrico de Caritate magistro Rogero de Worde magistro Ricardo de Bremel magistro Nicholao Martel magistro Roberto de Lavint[ona] magistro Iohanne de Reigate Ricardo de Bremelham et multis aliis