Charter Document - 03220283

Omnibus sancte matris ecclesie filiis ad quos presens scriptum pervenerit Ricardus divina permissione Sar ecclesie minister humilis salutem eternam in domino Attendentes id presertim bene et competenter agi quod ad augmentandum divini cultus et ob remedium indigentium impenditur animarum ad instantiam dilecti filii Willelmi de Merton archidiaconi Berksyr et persone de Ferendon de unanimi assensu et voluntate decani et capituli ecclesie Sar ad honorem sancte et individue Trinitatis et beate Virginis et omnium sanctorum dei et pro salute omnium fidelium animarum ordinavimus statuentes quod in dicta ecclesia de Ferendon de futuris ac perpetuis temporibus quatuor sint sacerdotes vicarius videlicet perpetuus qui de bonis vicarie ipsi assignate secum habeat unum sacerdotem sibi compensarem ecclesie et capelle de Cokeswell prout moris est et dudum extitit honeste deserviturus vicaria contentus quam assignaverat bone memorie Willelmus de Teyle eiusdem ecclesie persona Sarr canonicus Duo reliqui sacerdotes C solidos habeant annuos de oblationibus et proventibus eiusdem ecclesie utrique scilicet quinquaginta solidos quorum unus missam de sancta Maria cum nota alius missam pro fidelibus defunctis similiter cum nota saltem in anniversario nostro et Willelmi archidiaconi perpetuis temporibus celebrabit Omnes autem quatuor cotidie conveniant ad omnes horas canonicas et ad missam de die induti sub pellicio et capa clausa nigra more clericorum Sarr ecclesie vicario cum uno eorum ex una parte chori et aliis duobus capellanis in altera parte chori locis convenientibus decenter consistentibus Communiter etiam dicant dicti sacerdotes horas de beata Virgine item Placebo et Dirige cotidie in choro preterquam in festis ix lectionum quibus diebus festivis dicant Placebo et Dirige voce submissa ante altare beate Virginis ubi celebranda sunt divina de sancta Maria et pro defunctis Ibidem etiam integre dicant singulis diebus commendationem antequam dicatur missa pro fidelibus Sacerdotes autem qui de sancta Maria et pro fidelibus defunctis celebraturi sunt in diebus dominicis et in maioribus sollempnitatibus statim post lectum evangelium sollempnis misse de die accedant ad altare beate Virginis celebraturi Porro si memoratis sacerdotibus aliquid a quoquam parochianorum de Ferendon donatum fuerit vel legatum post legatum ecclesie persone et vicarii illud una cum C solidis sibi assignatis libere percipiant inter se communicandum Quod si alteruter duorum capellanorum decedat vel ex causa cedat vel recedat alter ei a persona dicte ecclesie infra mensem substituatur Alioquin si deses fuerit episcopus vel capitulum si episcopus postquam ad e ius pervenerit notitiam per alium mensem facere hoc omiserit presbiterum defuncto substituat competentem quamdiu honeste conversatus fuerit et servitium cui deputatus est bene fecerit non amovendum Ut autem ordo certus et competens in collectis dictarum missarum observetur cura sollicita et cauta diligentia cum deliberatione previa statuimus quod in missa beate Virginis prima sit oratio Concede nos famulos tuos vel alia que tempori congruat vel festivitati secunda Deus qui corda fidelium tertia pro nobis et memorato archidiacono Willelmo dum vixerimus Omnipotens sempiterne Deus miserere famulis tuis post decessum autem nostrum Deus cuius misericordie non est numerus vel Deus qui inter apostolicos sacerdotes pontificali vel sacerdotali ordine et loco competenti dicenda quarta pro omnibus parochianis benefactoribus parentibus et amicis ipsius archidiaconi vivis Pretende Domine famulis tuis dextram sexta interseratur loco competenti a celebrante pro defuncto vel pro defunctis pro arbitrio celebrantis septima generalis Pietate tua vel alia competens In missa autem pro defunctis prima pro anima mea et dicti Willelmi archidiaconi Deus qui inter apostolicos et sacerdotes pontificali seu sacerdotali secunda specialiter pro anima ipsius Willelmi archidiaconi Deus cuius misericordie non est numerus vel Que sumus Domine pro tua pietate tertia specialiter pro omnibus canonicis et vicariis Sar ecclesie et ecclesie de Ferendon defunctis Deus venie largitor quarta pro animabus quiescentium in cimiterio de Ferendon Deus cuius miseratione quinta pro omnibus parochianis ipsius archidiaconi et Sar ecclesie quandocumque et quocumque loco defunctis et pro omnibus benefactoribus antecessoribus successoribus parentibus amicis Inclina Domine aurem tuam vel Omnipotens sempiterne Deus cui nunquam vel Fidelium Deus omnium conditor sexta interseratur loco et ordine competenti a celebrante quam elegerit septima generalis Pietate tua vel alia competens Faciant autem omnes sacerdotes predicti fidelitatem cum admissi fuerint persone de Ferendon qui pro tempore fuerit quod de hiis que ad ipsum pertinent nichil usurpabunt sibi nec partem ipsius in aliquo facient deteriorem ob gratiam vel favorem aliquorum vel sui commodi causa et quod officium modo supradicto fideliter adimplebunt Quod ut futuris temporibus firmum et stabile perseveret presenti scripto sigillum nostrum et sigillum capitoli nostri apponi fecimus Dat apud Sar per manum Valentini clerici nostri v non Octobris pontificatus nostri anno undecimo Hiis testibus dominis W decano Rogero precentore Roberto cancellario Eadmundo thesaurario sancte ecclesie Sar Stephano archidiacono Wiltesyr magistro Elya de Derham magistro Luca magistro Henrico Tessun magistro Henrico de Sancto Edmundo magistro Willelmo de Lincol magistro Thoma de Ebelech magistro Rogero de Wrth magistro Willelmo de Lori Ricardo de Maupodr Rogero succentor Willelmo de Leic Thoma de Sancto Martino Petro Picoyt canonicis Sar et multis aliis