Charter Document - 03220267

Omnibus Cristi fidelibus ad quos presens scriptum pervenerit Ricardus dei permissione Sarum ecclesie minister humilis salutem in domino eternam Noverit universitas vestra quod cum prior et conventus de Brommore ordinationi et dispositioni nostre commisissent quicquid iuris habuerunt in ecclesia de Enebebum Wake nos cum tam per instrumenta quam per eorum possessionem de ipsorum iure nobis constaret de predicta ecclesia ordinavimus in hunc modum Videlicet quod dicti prior et conventus futuris et perpetuis temporibus percipient nomine beneficii medietatem garbarum de decimis de predicta parochia provenientibus aliam medietatem predictarum garbarum cum omnibus aliis decimis percipiente memorate ecclesie persona qui pro tempore fuerit ab episcopo Sarum tamquam patrono illius ecclesie et episcopo in perpetuum promovendus Aream etiam in qua dicti canonici possint bladum quod in prefata ecclesia percipient collocare eisdem concessimus de terra predicte ecclesie ipsis assignandam Concedimus etiam si in hoc commode concordare possint dicti canonici et rector illius ecclesie quod dictis canonicis assignetur in loco certo certa et limitata portio garbarum nomine medietatis garbarum parochie prefate percipienda ut utriusque partis tranquillitati uberius possit provideri Onera etiam moderna ordinaria et extraordinaria inter se pro rata partiantur dicti prior et conventus et rector memoratus Et ut hec ordinatio nostra rata permaneat ad maiorem securitatem huic scripto in modum cyrographi confecto cuius una pars penes ecclesiam Sarum altera pars penes monasterium de Brommor remanebit appositum est signum nostrum una cum sigillo capituli Sarum et sigillo predictorum prioris et conventus de Brommora Actum apud Sarum anno ab incarnatione domini MCCXXIIII xvii kalendas Maii Hiis testibus dominis Willelmus decano Galfredo cantore Robertus cancellario Edmundus thesaurario Sarum et aliis