Charter Document - 03210249

Venerabili patri in Cristo H dei gratia Cant archiepiscopo tocius Anglie primati H divina permissione Sar episcopus salutem et tam devotam quam debitam in omnibus reverenciam Inspectis sancte paternitatis vestre litteris super clericis tam residentibus quam non residentibus secundum certam formam in eisdem litteris prescriptam ad subveniendum pauperibus diligenter et efficaciter commonendis et super auxilio domino regi imparciendo eisdem clericis conveniendis et inducendis pronum ad utrumque secundum deum habuimus animum et paratum Set de elemosinarum largicione aliquatenus certificati in secundo articulo aliquantulum hesitavimus eo quod decimam partem clericorum regimen ecclesiarum in episcopatu nostro habencium in singulis capitulis presentes habere non possumus et illi qui presentes sunt scilicet annui vicarii et admodum pauci persone et perpetui vicarii sine maiori et saniori parte absencium nobis certam dare responsionem recusant Unde quid de absentibus inducendis vel compellendis faciendum esse decreveritis nos per litteras vestras instruere velitis Nos enim sine consilio vestro contra tot absentes qui propter nimiam remocionem in tam brevi tempore congregari non possunt in predicto negocio nichil adhuc attemptare potuimus Set tam in hiis quam in aliis audito prudencie vestre consilio pronum secundum deum adhibebimus consensum Preterea quia animum vestrum erga nos quadam suspicione motum esse accepimus eo quod in electione abbatisse monialibus Wilton preficiende partes nostras secundum desiderium voluntatis vestre dicimur non interposuisse hoc vestram scire desideramus discrecionem quod ad hoc spirat mentis nostre desiderium ut aliqua quecunque sit ilia secundum deum domui predicte preficiatur quia deo teste audacter profitemur quod nec caro nec sanguis nec aliqua alia familiaritas consensum nostrum ad aliquam certam personam inclinavit Verumptamen si de voluntate vestra nobis constaret quam non dubitamus in hiis et in aliis secundum deum processuram nos libenter efficacius et diligencius iuxta sancte discrecionis vestre beneplacitum diligenciam et sollicitudinem nostram inter posuissemus Set quia nichil sancta paternitas vestra in hoc negotio nec litteris nec viva voce aliquando nobis duxit exprimendum quod aliquam formam certe voluntatis vestre nobis indicaret nostram neggligenciam vel incuriam in nullo si placet reprehendere poteritis Ad hec quia sicut in litteris vestris perpendimus magistrum Rogerum de Winesham quedam verba in capitulo Wilton contra excellendam dignitatis vestre proponitis dixisse nos in quantum potuimus plenius super hoc inquisita veritate vobis significamus quod prefatus magister R nichil inhonestum nichil probrosum nichil quod sanctitati vestre posset displicere ibidem proposuit Unde paternitati vestre pro eo supplicamus quatinus querelam vestram quam litteris vestris contra eum nobis directis accepimus in paciencia sustinere dignemini donec vobis sufficientem excusacionem viva voce vel si opus fuerit satisfactionem possimus exhibere Valete