Charter Document - 03210125

Ioscelinus dei gratia Sar episcopus omnibus sancte matris ecclesie filiis ad quos presens carta pervenerit veram in domino salutem Commune votum communem utilitatem prosequi debet ut ea que pro communi utilitate facta fuisse noscuntur perpetue firmitatis robore muniantur Inde est quod nos karissimorum filiorum nostrorum Sar ecclesie canonicorum ac ceterorum clericorum ibidem deo servientium dilectionis fervorem ac sinceram devotionem quam erga nos semper habuisse noscuntur diligenter attendentes universitati vestre presentium insinuatione notificare duximus nos ecclesiam de Awalton cum omnibus pertinentiis suis et libertatibus commune canonicorum Sar ecclesie cui deo auctore licet inmeriti presidemus concessisse ac donasse et episcopali auctoritate confirmasse Verumtamen quoniam prefatam ecclesiam prius Nigello canonico nostro concesseramus idem Nigellus eam ex permissione et assensu canonicorum suorum Sar ecclesie tenebit reddendo inde singulis annis commune canonicorum unum aureum in recognitionem videlicet quod ipsa ecclesia ad communam pertineat Et si forte idem Nigellus ad maiorem dignitatis gradum in ecclesia Sar tempore aliquo promotus fuerit vel ecclesiam de Awelton casu aliquo possidere desierit ecclesia illa libere et quiete et inconcusse et absque alicuius contradictione ad communam integre et plenarie redeat hoc quidem devote concesso et fideliter observato sicut in autentico capituli scripto continetur quod videlicet post obitum nostrum duas habebimus communas in ecclesia nostra singulis diebus et semper Una vero dabitur uni presbitero semper qui in ecclesia Sar tam in missarum sollempniis quam in vigiliis et animarum commendationibus plenarium faciet servitium pro anima nostra singulis diebus et ita in perpetuum Reliqua vero dabitur fratribus de Monasterio Oderoso semper qui consimile servitium facere tenentur pro anima nostra in perpetuum In die vero anniversarii nostri C pauperes pascentur pro anima nostra in perpetuum de pane et cervisia et ad minus de uno ferculo camis vel piscis sicut dies illa exegerit Ut autem hec nostra donatio rata et inconvulsa perpetuo maneat nos eam presentis carte patrocinio communire et sigilli nostri impressione duximus corroborare Et quia volumus hanc nostram donationem et concessionem inviolabiliter perpetuo vires habere auctoritate nobis deo commissa firmiter inhibemus ut nulli omnino hominum sub interminatione anathematis liceat ei aliquatenus contraire Quicumque vero eam qualibet occasione vel temeritatis audacia perturbare presumpserit maledictionem omnipotentis dei et genitricis sue beate Marie virginis et nostram et omnium illorum quorum usibus necessariis profutura hec donatio facta est noverit se incursurum