Charter Document - 03210084

Iocel dei gratia Sar episcopus dilectis in Cristo fratribus Hugoni abbati ceterisque fratribus Cerasiensis monasterii in domino salutem Officii nostri nos hortatur auctoritas ut ea que sacris locis et deo servientium usibus conferuntur sub nostra debeamus protectione suscipere et ne pravorum hominum rapacitate auferri vel minui valeant episcopali auctoritate eadem confirmare Ea propter dilecte in domino frater Hugo abbas tuis iustis postulationibus annuentes et tue tuorumque indempnitati in posterum providentes confirmamus monachis Scireburne et per eos Cerasiensi monasterio ecclesiam de Aldormannestona cum omnibus eidem ecclesie pertinentibus salva in omnibus Sar episcopi obedientia et reverentia Confirmamus nichilominus tam monachis quam monasterio predicto crementum quod Willelmus Acardus eis dedit unam scilicet virgatam terre in eadem Aldormannestona et xv acras que iacent ante ianuam monachorum ortum quoque qui fuit Hom et alium ortulum in occidentali parte ei contiguum Si quis igitur hanc nostre confirmationis cartam sciens contra eam temere venire temptaverit noverit se in extremo examine rationem redditurum Conservantibus autem et predictorum monachorum paci et indempnitati providentibus sit pax deo et domino nostro Ihesu Cristo qui cum patre et spiritu sancto vivit et regnat in seculorum secula Amen