Charter Document - 03210081
| Charter Number: | 03210081 |
|---|---|
| Cartulary Title: | Salisbury 1078-1217 Volume 18 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1175 - 1184 |
| Date type: | Assigned |
| Resource Link(s): |
|
Charter:
Iocelinus dei gratia Saresberiensis episcopus omnibus sancte matris ecclesie fidelibus salutem Ex officii nostri necessitate nobis incumbit ea que intuitu pietatis personis ecclesiasticis et precipue viris religiosis conferuntur auctoritate qua fungimur confirmare Ea propter fraternitati vestre notificamus dominam Margaretam de Bohun assensu Hunfridi filii et heredis sui ecclesie de Lanthonia et dilectis fratribus nostris canonicis scilicet ibidem deo servientibus ecclesiam de Chiriton liberam et quietam cum omnibus pertinentiis suis et consuetudinibus et libertatibus in perpetuam elemosinam donasse et concessisse Et nos hanc donationem ne in posterum cuiusquam presumptione possit perturbari auctoritate episcopali corroboramus et presentis scripti attestatione et sigilli nostri impressione communimus eo salvo quod Symon capellanus predictis canonicis in prefata ecclesia perpetuam habet vicariam solvendo pro ea singulis annis quadraginta solidos Cum autem predicta ecclesia ab eo vacaverit libera et quieta et integra ad sustentationem predictorum canonicorum redibit salvo iure episcopali et rationabili victu ipsius vicarii Testibus Reginaldo episcopo Bath Ricardo archidiacono Bath Saverino archidiacono Saresberiensi magistro Ricardo de Inglesham Humfrido capell[ano] magistro Silvestro Rotberto monacho Sampsone clerico Rotberto capellano