Charter Document - 03191001

Venerabili patri suo Ricardo Dei gratia Cantuariensi archiepiscopo totius Anglie primati et apostolice sedis legato R[icardus] eadem gratia Coventrensis episcopus salutem et debitam obedientiam Noverit excellentia vestra Deum in sancto suo Thoma mirabilem Coventrensem dioecesim magno nuper visitasse miraculo Cuius quidem miraculi certitudinem exhibebit presentie vestre clericus lator presentium Cui ut ex querimonia usque ad audientiam vestram inde perlata innotuit virilia perfide et violenter iniusteque abscisa fuerunt Sed sanctus Dei Thomas devote supplicationis propitius exauditor assidua ipsius clerici orandi instantia propria moti misera suique pudore vehementer confusi tandem ei sub silentio noctis apparuit et amoto quod vulneribus appositum fuerat medicamine suo solito medendi modo ei una nocte alterum virilium plene reddidit similiter et reliquum alia nocte restituit Sed et cetera que in corpore vulnera acceperat omnino sanavit Cuius rei veritati non modo testimonium perhibet tota Coventrensis provincia sed et infinitus hominum eo transmeantium numerus oculata fide sic esse comperit testimonioque videndi et tangendi certum comprobavit ipso etiam auctore sceleris attestante et cum iuramento confitente sic se ea abstulisse sicut et in presentia vestra confessurus est Nichil itaque nobis inde dubitationis aut clericis nostris relictum est quibus restituta in hunc modum et oculis contigit aspicere manibusque palpare Valeat in perpetuum vestra sublimitas