Charter Document - 03180228

G[ilebertus] Dei gratia Lundoniensis episcopus dilectis sibi in Domino universis ecclesie beati Pauli parochianis et filiis salutem gratiam et benedictionem Clamat ad vos karissimi sancta civitas illa Ierusalem in qua vos a morte perpetua Dominus noster Iesus Christus sua morte liberavit Clamat ad vos sepulcrum Domini locus ille sanctissimus a quo Dominus Iesus die tertia morte superata resurgens nos in fide et spe resurrectionis et salutis eterne confirmavit Clamant ad vos sancta loca illa omnia que iam dudum Dominus presentia sua corporali frequentans nos ab infidelitatis errore revocando ea signis et virtutibus mirabiliter illustravit Hec fidelium Christi labore magnifica a paganorum iam diu potestate liberata et eruta in eorundem manus et potestatem iterato recidere perhorrescunt Plorant loca sancta principum suorum lamentabilem casum quorum aliis gladio cessis aliis in servitutem deductis terra illa sancta propugnatore iam carens tanquam preda infidelibus et inimicis crucis Christi nisi cito manum Dominus apposuerit exposita est Onus istud sustinent fratres nostri karissimi et milites Templi qui ob locorum sanctorum et in his manentium fidelium Christianorum defensionem omnibus se periculis exponere mortem etiam ipsam pro Christo et fratrum salute subire parati sunt Quibus ad repellendam multitudinem illam infinitam quantis opus sit discretio vestra non ignorat Unde pietati vestre tota supplicat orientalis ecclesia ut qui sibi presentia corporali subvenire non potestis facta sibi rerum vestrarum largitione per manum defensorum suorum militum scilicet Templi subveniatis et imminentia sibi pericula fraterne karitatis ope subveniatis Hortatur in hoc karitatem vestram domnus papa hortamur et nos in Christo karissimi omnibus qui eorundem fraternitatem susceperint et eis annuatim et in fine suo quod sibi Dominus inspiraverit prece et ammonitione nostra contulerint orationum ecclesie nostre suffragia concedentes et de iniuncta sibi penitentia dum in eadem fraternitate permanserint quadraginta dies annis singulis concessa nobis a Domino potestate relaxantes Valere vos optamus in Domino karissimi