Charter Document - 03180195
| Charter Number: | 03180195 |
|---|---|
| Cartulary Title: | London 1076-1187 Volume 15 |
| Charter Language: | Latin |
| Charter Origin: | Religious |
| Charter Type(s): | Report |
| Date: | 1186 |
| Date type: | Assigned |
| Resource Link(s): |
|
Charter:
Patri suo et domno summo Dei gratia pontifici Urbano frater Gilebertus eadem gratia Londoniensis ecclesie minister salutem et debitum prompta devotione famulatum Celsitudini vestre pater sancte duximus intimandum quod cum dilectus in Christo filius Radulfus clericus de Stifford quem in ecclesia de Stifford petitione et presentatione militis cuiusdam illius ecclesie patroni Gileberti Malet personam constitueramus eandem ecclesiam spontanea voluntate in manus nostras absolute resignasset idem ad nos miles accedens priorem Roffensis ecclesie ad eandem nobis vacantem ecclesiam presentavit asserens se eidem priori et conventui Roffensi eandem ecclesiam ut patronum divino intuitu concessisse unde concessionem suam auctoritate episcopali instanter a nobis petiit confirmari et prefatum priorem et conventum ad eandem ecclesiam admitti Communicato igitur super hoc prudentium virorum consilio prefatam militis concessionem gratam habuimus et acceptam et prefatos priorem et conventum Roffensem in prememorata ecclesia solemniter instituentes concessionem sibi factam et eorum institutionem scripti nostri autentici conscriptione roboravimus Procedente vero tempore ad aures nostras pervenit canonicum quendam Iohannem de Blakemora in nostra diocesi constitutum predicto priori et conventui de Roffa super sepedicta ecclesia de Stifford controversiam movere ipsosque occasione cuiusdam possessionis quam se nactum fuisse proponebat ad audientiam quorundam iudicum a celsitudine vestra delegatorum traxisse Cum autem tam a nobis quam coram ipsis iudicibus sepius esset requisitus an possessionem prefate ecclesie quam petebat auctoritate episcopali aut officialium eius et consensu patroni obtinuisset nec auctoritatem episcopi nec consensum patroni pro se voluit allegare nec possessionem ut canonice adeptam repetere set nude et simplici quorundam laicorum assertione adherens qui eum tempore quo prefate ecclesie firmarius extitit fructus et decimas ad eandem ecclesiam pertinentes percepisse affirmant eorum abutens simplicitate et ipsam ad assertionem quasi prius optente possessionis malitiose detorqueres possessionem prefate ecclesie seu canonica sit sive non mandati vestri optentu sibi postulabat assignari Noverit igitur vestra serenitas nos permittente Domino in regimine Londoniensis ecclesie viginti trium annorum perseverasse curriculis nec aliquo unquam nobis patuit indicio prefatum Iohannem in pretaxata ecclesia canonicam institutionem aut iustam possessionem per aliquem nactum fuisse cuius auctoritate possessionem ecclesie iuste potuisset optinere Huius autem rei veritatis seriem sublimitati vestre significamus ne per eius suppressionem discretionem vestram malitiose circumveniri permittamus Paternitatem vestram custodiat omnipotens Dominus per longa tempora incolumem pater sancte