Charter Document - 03180145
| Charter Number: | 03180145 |
|---|---|
| Cartulary Title: | London 1076-1187 Volume 15 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1163 - 1180 |
| Date type: | Assigned |
| Resource Link(s): |
|
Charter:
G[ilebertus] Dei gratia Lundoniensis episcopus dilectis sibi in Domino universis eiusdem ecclesie parochianis et filiis salutem gratiam et benedictionem Vestram spero karissimi non latere prudentiam quam sit utilis multorumque necessaria comodis hospitalis illa domus que prope ecclesiam beati Bartholomei Lundon[ie] constructa est in qua misericordie deservitur operibus et pauperum Christi necessitas assidue multo studio multaque diligentia sublevatur Que cum actis retro temporibus studiis huiusmodi vigilanter intenderit ad presens tamen Domino gratiam ministrante solito clarius enitescit et studio bonorum fratrum Ade videlicet G et G qui se nuper eiusdem domus pro Christo mancipaverunt et subdiderunt obsequiis uberius solito pietatis opera omnibus ad eam divertentibus exhibendo odoris boni fraglantiam iamiam plenius ex se circumquaque diffundit Hii nimirum cum iam sibi mundi gloria plurimum arrideret et rerum temporalium affluentia satis responderet ad votum totum quod sibi vel iure patrimonii a parentibus obvenerat vel quod laboribus anxiis terra marique perquisierant pro Christo relinquentes id ipsum in usus pauperum Christi contulerant et ut holocaustum acceptabile Domino plenius exhiberent post sua seipsos eorundem obsequiis humilime devoverunt Qui cibum esurientibus potum sitientibus nudis operimenta fatigatis tecti lectique requiem uberem egrotis misericordiam sollicite subministrantes laboris et obsequii sui mercedem sperant et exspectant a Domino ipsam utique quam repromisit ipse diligentibus se Quorum conversationem et opera quia Domino placere non ambigimus universitati vestre preces affectuose porrigimus ut domum illam in qua Domino iugiter obsequuntur affectuosius diligatis et elemosinas vestras per manus illorum in commune honum pauperum Christi fideliter erogandas sibi vel his quos destinuerint ad vos fidentissime committatis Omnibus vero qui de suis facultatibus eidem domui ad opera misericordie sustentanda quicquam inspirante Domino largiti fuerint de Domini misericordia confisi de iniuncta sibi penitentia viginti dies relaxamus et orationum et bonorum que tam in nostra quam sua fiunt ecclesia participes in hoc fiduciam subministrante Domino constituimus Valete