Charter Document - 03180121

G[ilebertus] Dei gratia Lundoniensis episcopus dilectis sibi in Domino archidiaconis decanis et omnibus in Lundon[iensi] diocesi constitutis ecclesiarum prelatis salutem gratiam et benedictionem In luce lucerna opus non est et cum quid sui per se natura clarescit id testibus aut testimoniis evincere citra necessitatem est Quanta siquidem caritatis studia quanta suffragia pietatis quanta denique totius humanitatis obsequia peregrinis pauperibus Cristi et omnibus necessitatem patientibus inpendat sanctum xenodochium Ierusolimitanum sancta scilicet domus Hospitalis ipsis iam olim rerum indiciis orbi innotuit ut non iam nostro super hoc testimonio sed pervulgate magis veritati fides debeatur Qui nimirum locus venerabilis ob meritorum insignia nonnullis meruit a regno simul et sacerdotio privilegiis insigniri Nos igitur patrum et prelatorum nostrorum vestigia debita veneratione subsequentes latores presentium nuntios et procuratores illius religiose domus cum testimonio litterarum nostrarum destinamus ad vos et quanta possumus devotione commendamus ad gratiam orantes et exortantes in Domino et in remissionem vobis iniungentes delictorum quatinus cum ad vos ob colligendas fidelium elemosinas eos declinare contigerit ipsos pii ministros operis pietatis intuitu benigne recipiatis ope et opera misericorditer promoveatis et iuxta commonitionem domini pape et indulta sibi privilegia debitam in omnibus reverentiam exhibeatis Subiectos quoque vestros eorum fraternitatem suscipere susceptamque ad finem usque fideliter observare sedulo commonere satagatis scientes quoniam non possunt fructus non esse participes qui bonorum se operum exhibent adiutores Omnes autem qui contemplatione Dei et pauperum Cristi fraternitati huic se addixerint eamque annua ut moris est observatione compleverint orationum et omnium bene fidorum commisse nobis a Deo ecclesie participes et statuimus Parochianis vero nostris quibus precipue debitores existimus penitentibus videlicet et peccata confessis qui hanc societatem debita devotione servaverint si in septem aut eo amplius annorum penitentia fuerint constituti quadraginta si minus viginti de iniuncta sibi satisfactione dies misericorditer relaxamus