Charter Document - 03180108

Venerabili domino fratrique karissimo R[ogero] Wygorn[iensi] Dei gratia episcopo frater G[ilebertus] Londoniensis ecclesie minister salutem et felices ad vota successus Cartam predecessoris vestri patrisque nostri venerande memorie S[imonis] Wygorn[iensis] dudum episcopi que sigillo ipsius impressa apud fratres nostros Glouc[estrie] monachos habetur inspeximus et controversiam ipsam que inter ipsos et canonicos Lantonie de corpore domni Milonis comitis Hereford[ie] cum humandum esset in presentia ipsius exorta est et biduo actitata in hunc modum partis utriusque assensu terminatam fuisse cognovimus Monachi siquidem se fundum ipsum in quo castellum Glouc[estrie] nunc situm est ante ipsius castelli constructionem possedisse seque ibidem ortum habuisse et capellanum suum hominibus suis ibidem domicilia habentibus per eos iura parochialia ministrasse et ipsorum corpora penes se sepulture tradidisse multis hoc attestantibus asserebant adicientes se licet fundum ipsum commutaverint ius tamen parochiale quod in ipso habuerant nulli umquam cessisse sed se ius ipsum et ante et post castelli fundationem usque tunc continue possedisse asserentes Rogerum de Pistres cui post adquisitionem Anglie custodia castri Gloucestrie primo commissa est et totam eius familiam post ipsum etiam Durandum de Pistres fratrem eius qui eidem custodie prefuit et ipsius familiam totam sepulturam penes se ut parochianos suos habuisse filium vero et familiam Walteri de Glouc[estria] qui successit eis quique in episcopatu Menevensi habitum suscepit canonici et ibi sepultus est et post hos quamplures ex familia successoris sui Milonis comitis penes se repositos quievisse seque in hunc modum ius sepeliendi eos qui intra castri ambitum decedebant continuasse sibi usu et antiquitate quam firmum suis oportet stare radicibus asserebant Que cum productis testibus probare parati essent lis hoc tandem fine quicuit Canonici corpus comitis de quo erat contentio nil sibi iuris vendicantes in ipso monachis liberum et quietum dimiserunt monachi vero precibus eorum quorum in carta domni Wygorn[iensis] predecessore vestri fit mentio corpus ipsum in ecclesia de Lanton[i]a in quam allatum fuerat sepulture tradi concesserunt hac tamen condicione quod canonici ipsi domnum Rogerum filium comitis et uxorem eius et heredes eorum omnes et quibus castelli de Glouc[estria] foret commissa custodia qui intra castri ipsius ambitum vite finem clauderent ecclesie beati Petri ad sepeliendos liberos et quietos absque omni reclamatione concesserunt hoc quidem confirmand[o] memoratus S[imon] Wygorn[iensis] tunc episcopus Rogerum comitem filium Milonis comitis manu accipiens nobisque tradens qui tunc Glouc[estrie] preeramus ecclesie ipsum et successores eius ecclesie sancti Petri attitulavit et in ea sepeliendos et humandos episcopali auctoritate constitute Quia vero hiis agendis interfuimus et hec in hunc modum processisse pro certo novimus ea presenti scripto fraternitati vestre notificamus quam recte semper incedere et a via non declinare iustitie peroptamus Valeat in Domino karissime