Charter Document - 03180095

Gilebertus Dei gratia Londoniensis episcopus universis sancte matris ecclesie filiis ad quos presentes littere pervenerint salutem in Domino Scripture suffragio non inmerito memorie commendantur per que litium finis exprimitur ne denuo suscitentur Inde est quod universitati vestre presenti scripto curavimus intimare causam que vertebatur inter venerabilem fratrem nostrum R[ogerum] abbatem sancti Augustini Cantuarie eiusdemque loci conventum et S presbiterum super ecclesia sancti Petri de Sandwico nobis a summo pontifice appellatione remota delegatam hunc in nostra presentia terminum fuisse sortitam Evocatus siquidem ad nostram presentiam S presbiter et tandem post multas coactiones apparens audito quod adversus ipsum proponebatur prefatam scilicet ecclesiam ad ius sancti Augustini esse pertinentem et eam ab ipso per multum tempus violenter fuisse detentam post dubias quasdam responsiones cum certius respondere iuberetur tandem hiis que sibi obiciebantur assensit et sepedictam ecclesiam ad prefatum abbatem pertinere et oleum et crisma ab ecclesia sancti Augustini recipere et semper recepisse recognovit Nos itaque habito cum viris prudentibus consilio tum ex rationibus quas ex parte monachorum intelleximus tum ex adverse partis confessione iam dictam ecclesiam auctoritate qua fungebamur apostolica et nostra prefato S presbitero abiudicavimus et eam venerabili fratri nostro R[ogero] abbati sancti Augustini Cantuarie qui causam agebat et monachis suis adiudicavimus Ut igitur hec nostra sententia firma stet et in posterum permaneat inconvulsa presentis eam inscriptione pagine confirmavimus et nostri pariter appositione sigilli roboravimus Hiis testibus S[imone] abbate sancti Albani Waltero abbate Colecestrie Nicholao archidiacono Lund[oniensi] magistro Ricardo de Stortef[ordia] Henrico thesaurario magistro Radulfo de Altaripa Ricardo de Salesb[eria] Radulfo de Chiltone clericis nostris magistro Hosberto magistro Mauritio et multis aliis