Charter Document - 03180044

Anno millesimo centesimo quadragesimo octavo incarnationis Domini nostri Iesu Cristi ego Robertus dei gratia Lundoniensis episcopus consecravi et dedicavi ecclesiam apud Colum in honore beate virginis Marie genetricis dei omnipotentis et beati Iohannis evangeliste et in populo vocatione facta ut accederet si quis calumniam adversus aliquam possessionem ecclesie haberet nullo calumniante confirmavi et corroboravi omnes possessiones quas in illa die ecclesia inconcusse possedit in terris in ecclesiis in decimis sive in aliis elemosinis et ne in posterum aliquid possessionis ecclesie quis auferre vel calumniare presumat ex auctoritate dei patris omnipotentis et filii et spiritus sancti atque ex vice beati Petri apostoli excommunicamus et anatematizamus et maledicimus omnes quicumque istius ecclesie possessiones abstulerint vel diripuerint vel depopulati fuerint vel scienter iniuste calumniaverint Maledicti sint a sancta dei genetrice Maria et a sancto Iohanne evangelista et ab omnibus angelis et archangelis patriarchis prophetis et apostolis dei amen Maledicti sint ab omnibus martiribus confessoribus virginibus viduis et ab omnibus sanctis et electis dei amen Sicut fluit cera a facie ignis sic pereant malefactores huius ecclesie a facie dei omnipotentis amen Sit pars eorum cum Datan et Abiron quos terra vivos absorbuit et cum Iuda proditore qui dominum pretio vendidit amen Et sicut dominus beato Petro apostolo eiusque successoribus cuius vicem tenemus quamvis indigni potestatem dedit ut quodcumque ligarent super terram ligatum esset et in celis et quodcumque solverent super terram solutum esset et in celis ita illis si emendare noluerint celum claudimus et terram ad sepeliendum negamus ut dimergantur in inferno inferiori sine fine amen Fiat fiat fiat