Charter Document - 03169170
| Charter Number: | 03169170 |
|---|---|
| Cartulary Title: | Worcester 1218-1268 Volume 13 |
| Charter Language: | Latin |
| Charter Origin: | Religious |
| Charter Type(s): | Settlement |
| Date: | 1257 |
| Date type: | Internal, A.D., Feast |
| Resource Link(s): |
Reference Document for this Embedded Document |
Charter:
Hec est ordinatio facta anno domini MCCL septimo in crastino sancti Barnabe apostoli in ecclesia parochiali de Kideminstr inter priorem de Wotton ex parte una et magistrum Iohannem de Wynton rectorem ecclesie de Claverdon ex altera super decimis maioribus et minoribus villarum de Norton et Langley et capellis earundem per dominum archidiaconum Stafford et officiales dominorum episcopi et archidiaconi Wygorn a partibus communiter electos videlicet quod dicte capelle cum decimis predictis parochialibus proventibus obventionibus iuribus et omnibus aliis pertinentiis ad easdem de cetero pertineant ad ecclesiam de Claverdon et ab eiusdem rectore qui pro tempore fuerit imperpetuum quiete possideantur et quod dictus rector et sui successores dicto priori et suis successoribus solvent annuatim et perpetue quinque marcas et octo solidos argenti in ecclesia de Wawennes Wotton scilicet in festo beati Iacobi apostoli vel infra biduum sequens duas marcas decem solidos et octo denarios et in festo sancti Martini vel infra biduum sequens duas marcas decem solidos octo denarios sub pena unius marce solvende dicto priori pro quolibet termino inobservato rato manente principali una cum expensis si quas fecerit dictus prior pro predictis perquirendis subiciens se dictus rector iurisdictioni cuiuscumque iudicis ordinarii seu delegati quem dictus prior duxerit eligendum qui ipsum et successores suos possit compellere sine cause cognitione ad observantiam omnium predictorum et singulorum per sententiam excommunicationis vel aliam censuram ecclesiasticam quam duxerit attemptandam Ordinarunt et dicti ordinatores quod decime proventus et alia supradicta necnon et dicta pecunia annua a dicto rectore solvenda remaneant in sequistratione officialis episcopi vel archidiaconi Wigorn quousque dicta ordinatio a domino Wigorn episcopo et suo capitulo fuerit confirmata qua confirmatione obtenta dicte capelle decime et alia omnia supradicta ecclesie de Claverdon et eiusdem rectori sine contradictione restituantur per officialem predictum et prefata pecunia reddatur priori memorato per eundem Et sciendum est quod donec dicta confirmatio fuerit obtenta corpora mortuorum apud Wotton sepeliantur de villis supradictis et viri manerii ibidem audiant divina Post confirmationem vero obtentam mortui de predictis villis apud Claverdon sepeliantur et viri parochiani ecclesie de Claverdon efficiantur et sacramenta ecclesiastica percipiant ibidem In quorum omnium testimonium tam dicti ordinatores quam partes presentibus signe sue apposuerunt