Charter Document - 03169094

Auctoritate dei omnipotentis patris et filii et spiritus sancti et gloriose dei genetricis semperque virginis Marie beatorum apostolorum Petri et Pauli omniumque apostolorum beati Thome archiepiscopi et martyris et martirum omnium beati Edwardi regis Anglie omniumque confessorum atque virginum omniumque sanctorum dei excommunicamus anathematizamus et a liminibus sancte matris ecclesie sequestramus omnes illos qui amodo scienter et maliciose ecclesias privaverint vel spoliaverint suo iuro Item omnes illos qui ecclesiasticas libertates vel antiquas regni consuetudines approbatas et precipue libertates et liberas consuetudines que in cartis communium libertatum et de foresta continentur concessis a domino rege archiepiscopis episcopis et ceteris Anglie prelatis comitibus baronibus militibus et libere tenentibus quacumque arte vel ingenio violaverint infregerint diminuerint seu mutaverint clam vel palam facto verbo vel consilio contra illas vel earum aliquam in quocumque articulo temere veniendo Item omnes illos qui contra illas vel earum aliquam statuta ediderint vel edita servaverint consuetudines introduxerint vel servaverint introductas scriptores statutorum necnon consiliarios et executores et qui secundum ea presumpserint iudicare Qui omnes et singuli superius memorati hanc sententiam incursuros se noverint ipso facto qui scienter aliquid commiserint de predictis qui vero ignoranter nisi commoniti infra quindenam a tempore commonicionis se correxerint et arbitrio ordinariorum et plane satisfecerint de commissis ex tunc sint hac sentencia involuti Eadem etiam sentencia innodamus omnes illos qui pacem regis et regni presumpserint perturbare