Charter Document - 03169074

Memorandum quod cum inter viros religiosos abbatem et conventum sancti Petri Glouc ordinis sancti Benedicti Wygorn dyoecesis ex parte una et priorem et fratres hospitalis Ierosolomitani in Anglia ex altera super spoliatione duarum marcarum annue pensionis de ecclesia de Queninton eiusdem dyoecesis suborta fuisset materia questionis ac partibus coram officiali venerabilis patris domini Wygorn episcopi ordinario iure cognoscente aliquamdiu litigantibus a prefatis abbate et conventu mere possessorium iudicium intentantibus et restitui petentibus pars dictorum hospitalariorum excipiendo proposuit quod coram dicto officiali respondere non debebant cum a iurisdictione ordinaria auctoritate sedis apostolice cui immediate subiecti sunt in omnibus causis tam realibus quam personalibus undecumque subortis sint prorsus exempti ita ut non nisi coram domino papa vel ab eo iudice delegato teneantur respondere quod ut asserebant per exhibitionem privilegii a domino papa sibi concessi et eidem officiali in iudicium exhibiti evidenter constabat Et quia idem officialis ipsos ut dicebant super hoc audire recusabat reputans insuper ipsos contumaces cum non essent in unam marcam argenti ipsos perperam condemnavit eorum procurator legitimus sentiens dominos suos indebite pregravari dominum papam ad tuitionem sedem Cant ut asserebant appellavit Et demum partibus in presentia decani de arcubus Lond officialis curie Cant commissarii generalis in causa tuitionis predicta cognoscentis per procuratores legitime constitutos et speciale mandatum habentes sufficienter comparentibus et prefatam tuitionis causam aliquamdiu agitantibus tandem inter eosdem lis conquievit in hunc modum videlicet quod pars dictorum hospitalariorum firmiter ac bona fide promisit quod citra Pascha proximo futurum dictis abbati et conventui anni presentis duarum marcarum predictam restitueret pensionem et submiserunt se partes predicte venerabili patri domino Wygorn episcopo in quem tanquam in ordinatorem pure et absolute consenserunt et eiusdem ordinationi seu arbitrio tam super iure quam possessione pensionis predicte necnon super ceterorum arreragiorum restitutione se penitus submiserunt ita quod idem venerabilis pater summatim et de plano sine strepitu iudiciali super premissis cognoscens pronuntiet ordinet seu arbitretur super eisdem prout secundum domini et iustitiam ac secundum iura et rationes partium viderit expedire Cuius ordinationem seu arbitrium partes bona fide ac sacramento in animas dominorum suorum a procuratoribus prestito promiserunt firmiter observare submittentes dominos suos in hac parte coertioni predicti domini episcopi quod possit partes prefatas ad observationem omnium et singulorum que premissa sunt per quamcunque coertionem ecclesiasticam sine strepitu iudiciali compellere renunciantes in hac parte exceptioni cavillationi appellationi impetratis et impetrandis et omni tam iuris civilis quam canonici remedio partibus in contrarium competenti seu competitura salvis in omnibus aliis causis et negotiis predictis priori et fratribus privilegii sibi a sede apostolica concessis Et cum predictus dominus episcopus in suam veniens dyoecesim ibidem contraxerit moram diebus et locis ab eodem partibus prefigendis comparebunt partes antedicte cum omnibus rationibus iuribus et munimentis suis eiusdem domini episcopi ordinationem seu arbitrium devote suscepture In quorum omnium testimonium idem venerabilis pater qui in se suscepit onus predictum decanus de arcubus Lond et procuratores partium habentes potestatem specialem subiciendi dominos suos ordinationi seu arbitrio domini episcopi supradicti presentibus signa apposuerunt Dat Lond die sabbati proxima post festum sancte Scolastice virginis anno domini millesimo ducentesimo quinquagesimo nono