Charter Document - 03168042

Gregorius episcopus servus servorum dei dilecto filio O sancti Nicholai in carcere Tullian diacono cardinali apostolice sedis legato salutem et apostolicam benedictionem Meminimus nos dudum venerabili fratri nostro episcopo Coventrensi dedisse nostris litteris in mandatis ut dilectis in Cristo filiabus sororibus monasterii de Cornebir Hereforden diocesis ab observancia ordinis hospitalis Ierusalimitan cuius habitum ex quadam simplicitate susceperant absolutis paratis beati Augustini regulam profiteri concederet ut secundum ipsum valerent ibidem vivere et dignum domino reddere famulatum maxime cum in ordine hospitalis ipsius non consueverit fieri collegium dominarum Verum cum negocium huiusmodi propter fratrum dicti hospitalis in Anglia difficultates et dilationes nimias per quinquennium et amplius protelatum perduci non potuerit ad effectum procuratoribus tandem partium propter hoc apud sedem apostolicam constitutis venerabilem fratrem nostrum Sabineum episcopum concessimus auditorem Nos igitur ab eodem nobis fideliter recitatis que procuratores ipsi proposuerant coram eo tam predictorum fratrum quam sororum ipsarum honestati ex officio nostro salubriter ac ita finaliter providere volentes ut idem negocium ulterius per inania minime deducatur discretioni tue per apostolica scripta mandamus quatinus prefatas sorores regulam beati Augustini profiteri volentes ab observancia ordinis memorati hospitalis absolvens ipsarum habitu deposito et professione recepta concedas eisdem ut secundum iam dictam regulam ibi vivere valeant et dignum domino reddere famulatum hospitalis prefati et cuiuslibet alterius in omnibus aliis iure salvo contradictores per censuram ecclesiasticam appellatione postposita compescendo Dat Viterbii xvii kal Augusti pontificatus nostri anno undecimo