Charter Document - 03160177

Universis Cristi fidelibus Walterus de Cantilupo miseratione divina Wygorn episcopus salutem in domino Cum bone memorie Willelmus de Bley quondam Wygorn episcopus predecessor noster quandam capellam apud Wygorn inter maiorem ecclesiam et aulam episcopi opere construi fecerit eleganti et sub eadem cryptum competentem in qua multorum ossa recondi fidelium constituit defunctorum in qua quidem tota capella predicta Carnaria vulgariter nuncupatur nos considerantes pium fore ac salubre cogitationis effectum in predicta capella predecessoris nostri qui tale post se memoriale reliquit nostrique antecessorum nostrorum omniumque fidelium defunctorum memorie providere ut in predicta capella ad divini cultus augmentum perpetualiter capellani qui in memoriam predictorum ad laudem dei et beate Marie virginis et beate Thome martyris in cuius nomine et honore dicta capella est constructa omniumque sanctorum divina celebrant in eadem devotionis ducti fervore de consensu capituli nostri Wygorn taliter sub spe uberiore providentie atque fortune in nomine patris filii et spiritus sancti duximus ordinandum Statuentes quod in predicta capella que carnaria dicitur sint quatuor capellani continue residentes quorum unus sit magister perpetuus ibidem ad dispositionem episcopi prefigendus qui quidem capellani in divinis officiis in omnibus canonicis et aliis que sibi incumbunt usum Sarum observantes pro viribus simul psallant et ad dictam capellam mane conveniant ad minus quam cito in civitate pulsatur eodem modo ad horas faciant vespertinas Circa missarum autem officia ita se habeant capellani quod cotidie antequam scolas adeant celebretur una missa de die cum nota et auditis lectionibus tres celebrentur cotidie pro defunctis et hoc sine nota si voluerint vel cum nota Circa statum vero capellanorum predictorum qualiter se habere debeant in victu et gestu taliter ordinamus videlicet quod omnes scolas exerceant simul comedant et in una domo simul dormiant De viginti autem marcis ad capellanorum sustentationem in dictis locis specialiter deputatis predictus magister cuilibet trium sacerdotum viginti duos solidos annuatim pro stipendiis exhibere de reliquo vero quod superest teneatur in exhibitione esculenti et poculenti eisdem Ita scilicet quod cotidie habeant bonum panem triticeum et bonam cerevisiam cuiusmodi bona in civitate dicta communiter consuevit et unum ferculum sufficiens et honestum cum una pitancia competentis prout status patrie et temporum qualitas possibilitas diversimode se extendet Tenebit dictus magister de dicta pecunia accepta unum clericum sufficientem et alia onera dicte capelle luminare videlicet libros vestimenta et alia Insuper etiam in eorum hospitio unum servientem continue honestum et alia domus onera prout utilitas exegerit sustinere Sacrista vero predicte capelle ac etiam hospitii dictorum capellanorum edificia ne contingant ipsa ruinosa fieri sustentabit Ad evitandum insuper omnis suspicionis incommodum in premissis volumus observari ne predicti capellani magister aut alii laycos aliquos et maxime mulieres sibi in societatem assumant nec sit igitur frequens accessus laicorum nec aliquatenus mulierum nec etiam capellani predicti instabilium more vagabundi existant nec aliqua suspecta frequentent se gerant sicut sacerdotalem decet in omnibus honestatem Hanc autem ordinationem nostram observantes et eandem ope consilii et bonorum largitionibus promovere caritatis intuitu satagentes bonorum omnium que in dicta capella fient imperpetuum et nostre benedictionis concedimus esse participes illam autem malitiose impedientes seu perturbantes vel quomodo libet violantes indignationem dei omnipotentis et gloriose virginis matris eius et apostolorum Petri et Pauli et beati Thome martyris predicte capelle patroni omniumque sanctorum et nostram maledictionem incurrant In cuius rei testimonium predictam ordinationem fecimus sigilli nostri impressione muniri ac etiam eandem sigilli capituli nostri Wigornie munimine roborari Dat Wygorn in die sabbati proximo ante festum purificationis beate Marie virginis anno domini millesimo CCLX quinto