Charter Document - 03160176

Anno domini MCCL quarto sexto idus Martii convenit inter venerabilem patrem Walterum Wygorn episcopum ex una parte et priorem et conventum Wygorn ex altera Videlicet quod compositio facta per venerabilem patrem Stephanum Cantuariensem archiepiscopum super electione prioris Wygorn et custodia prioratus cum articulis in eadem compositione contentis et carta Edgari regis in omnibus suis articulis stent et robur optineant firmitatis Ita tamen quod ballivus principalis totius libertatis hundredi de Oswaldeslawe sit communis tam ipsi episcopo et successoribus suis quam priori et conventui supradictis et utrisque iuratus ab episcopis tamen ponendus et ballivis domini regis pro toto hundredo de Oswaldeslawe presentandus Si tamen prior et monachi infra octo dies postquam premuniti fuerint de persona presentanda acceptaverint vel rationabilem causam coram episcopo vel senescallo suo ostenderint vel docuerint quare talis ballivus poni et presentari non debeat alius modo predicto presentetur et ponatur qui etiam ballivus episcopo vel suis successoribus vel assignatis suis de exitibus pertinentibus ad ipsum similiter et monachis vel eorum assignatis de exitibus pertinentibus ad ipsos fideliter respondebit Et si predictus ballivus delinquat erga monachos predictos et de hoc constiterit corrigatur vel amoveatur per episcopum vel senescallum suum et alius subrogetur in forma prescripta Preterea ballivus predictus iuratus duos tantum habebit ministros sub se pedes unum in terris episcopi et alium in terris monachorum ita quod unus in terris episcopi et alius in terris monachorum ministerium suum exerceat et superior ballivus in utriusque Et cum necesse fuerit predicti duo inferiores ballivi et ministri tam in terris episcopi quam in terris monachorum secundum dispositionem ipsius ballivi superioris mutuo se iuvabunt Predictus vero minister qui ministrabit in terris monachorum superiori ballivo iurato nominabitur et presentabitur per monachos predictos et ab ipso admittetur si inveniatur ydoneus et per ipsum etiam amovebitur cum viderit expedire et alius loco sui subrogabitur in forma prescripta Ita tamen quod ille minister qui ministrabit in terris prioris et monachorum nullum sacramentum prestabit nisi predicto superiori ballivo hundredi nec aliquam extractam vel retur num recipiet de hiis qui spectant ad libertatem hundredi de Oswaldeslawe nisi per superiorem ballivum eiusdem hundredi et si receperit pro nullo habeatur Occasione autem istius conventionis aut contentionis prehabite non ingredietur senescallus aut alius ballivus episcopi quam predictus iuratus terram prioris et conventus Wygorn infra hundredum de Oswaldeslawe ad aliquod faciendum quod ante contentionem super predictis habitam fieri non consuevit Convenit etiam hinc inde inter partes quod tam episcopus quam prior et monachi supradicti in rebus et libertatibus communibus adquirendis et defendendis mutuo et fideliter se iuvabunt Consenserunt autem episcopus prior et conventus quod ista compositio sit perpetua et realis In cuius rei testimonium et munimentum huic conventioni partes signa sua alternatim apposuerunt