Charter Document - 03160158

Ego Walterus Wigorniensis episcopus procurator episcoporum Anglie legitime constitutus propter absentiam venerabilis patris Bonefacii dei gratia Cant archiepiscopi in transmarinis partibus agentis in ecclesia beati Pauli Lond tanquam in loco publico et eminenti ac communi propono quod cum nuper inter dominum regem et magnates maxime intestine orta esset materia discordie per quam toto regno turbato contingit quod tam ecclesiis quam ecclesiasticis personis tam in se quam in rebus multipliciter extitit iniuriatum tum ecclesiarum immunitatibus irreverenter violatis extractis inde personis tam prelatis quam subditis tam clericis quam laicis ad ipsas confugientibus rebus tam sacris quam religiosis quam etiam privatis ibidem invasis et inde violenter asportatis tum personis ecclesiasticis captis et incarceratis ac male tractatis et demum usque ad eviscerationem redemptis prelati vero scilicet episcopi domini mei hec videntes Lond convenerunt diligentem inter se habentes tractatum qualiter ecclesie statui providere et grassantium seu malefactorum occurrere possent malitiis Et tandem tam clero quam populo convocato dicti episcopi pontificalibus induti puplice et solempniter in scriptis malefactores ipsos qui ipso facto in canonem late sententie inciderant in genere denuntiaverunt excommunicatos alios vero iuris ordine observato pronuntiaverunt esse excommunicandos et suas sententias inviolabiliter observari decreverunt quousque deo et ecclesie et personis lesis satisfactum fuerit competenter terminum vero emendationis faciende certum statuerunt nec tunc ulterius de iure procedere potuerunt ut debuerunt cum et si facta manifesta essent seu notoria non tamen malefactores ita fuerunt manifesti vel notorii Decreverunt etiam memorati episcopi quod quilibet in sua diocesi diligentem faceret inquisitionem super dictis transgressionibus et transgressoribus excommunicatis et excommunicandis et quos reos et culpabiles invenerit illos per censuram ecclesiasticam ad satisfaciendum lesis tam locis quam personis competenter et plenarie compelleret citra terminum prelocutum Sic autem negotio inchoato generis humani adversarius et discordiarum seminator tam ortas multiplicare satagit discordias quam plurimos alios pacificatos ad malefaciendum stimulare adeo quod dicti prelati et si voluerint non tamen valuerunt inceptum ad effectum perducere prelocutum imminentibus tam mortis quam salutis corporis periculis Unde protestor nomine prefatorum dominorum meorum quod ipsi parati sunt et pro loco et tempore parati erunt coram iudice competenti innocentie sue veritatem et diligentie constantiam legitime declarare Dico etiam nomine prenominatorum dominorum meorum episcoporum quod nec ipsi lesi de suis malefactoribus nec clam nec palam ausi fuerunt deponere querimoniam immo nec quemquam malefactorum nominare cum ipsorum depredantium et in res et in personas sine acceptatione earum irruentium nemini parceret oculus nec ullis deferret privilegiis Item pro eo quod dudum maiores regni depredationibus et spoliationibus ecclesiarum et ecclesiasticarum personarum et bonorum in eisdem ecclesiis repositorum irretiti in publica congregatione Londoniis facta ab episcopis provincie Cant super celeri emendatione et competenti satisfactione solempniter et legitime ammoniti tam domini regis quam totius regni nomine unanimiter responderunt quod optenta regni tranquillitate et pace firmata facerent omnibus ecclesiis et personis lesis satisfactionem quantum in ipsis est debitam exhiberi appellantes sedem apostolicam ne quid asperum vel durum contra eos impetraretur statueretur seu per executionem aliquam mandaretur ex hiis dictorum dominorum meorum episcoporum circa officii sui executionem debitam allego diligentiam allego etiam quod si caput ipsorum presens extitisset et eisdem malefactorum audaciam comprimere volentibus affuisset auctor et auxiliator liberius officium suum exercuisse potuissent presertim cum suis suffraganeis super hoc et ad hoc faciendum specialiter fuerit requisitus preterea cum proprie salutis discrimini et mortis periculo nullum compellant iura ad obediendum sic ubi multitudo est in causa potius suadent esse detrahendum severitati Ne igitur ibi figatur culpa ubi culpa non est et innocens inmerito et saltem de facto puniatur ego Walterus procurator supradictorum episcoporum in scriptis ad sedem apostolicam et in subsidium ad consilium generale nomine dominorum meorum appello ne quis ordinarius seu a quacumque sede legatus aliquid contra eos circa res vel personas statuat vel statuere presumat vel quamcumque penam suspensionis interdicti vel excommunicationis pretextu iniuriarum predictarum adhuc inultarum personis vel rebus infligere presertim cum quiescente hostilitate et turbatione regni sedata parati sint universi et singuli tam omnibus querelantibus iustitie exhibere complementum quam cessantibus actoribus et accusatoribus ex officio suo cognoscere et vindicare quatenus iura permittunt et ratio suadet equitatis In cuius rei testimonium huic libello appellatorio sigilla plura apponi procuravi