Charter Document - 03160153

Universis Cristi fidelibus ad quos presens scriptum pervenerit Walterus miseratione divina Wygor ecclesie minister humilis salutem in domino sempiternam Ad universitatis vestre notitiam volumus pervenire quod vacante vicaria ecclesie de Suckel per mortem Gilberti proximo ministrantis in illa Willelmus de Kalehull rector ecclesie de eadem presente et conscentiente priore de Newent procuratore abbatis et conventus de Cormell verorum ipsius ecclesie patronorum consolidari vicariam personatui cum instantia postulavit asserens olim factam fuisse huiusmodi sectionem absque cuiuscumque superiorum auctoritate consensu tantummodo privatorum qui nec mansum quo rector pro tempore declinaret nec solum quo sibi construeret receptaculum reliquerunt sed Iohannes de Persora capellanus consolidationem huiusmodi se opponens vicariam ipsam sibi petiit assignari pretendens pro iure suo quod olim ad ipsam tunc vacantem a prefato priore nobis extiterat canonice presentatus et quod idem prior illam veterem presentationem novo consensu post mortem dicti G vive vocis oraculo innovatam et continuato proposito confirmatam nobis mandaverat exhiberi quod etiam dictus prior dilucide coram nobis fatebatur Tandem idem prior tam proprio quam procuratorio nomine salvis sibi et monasterio suo pensionibus et possessionibus et aliis universis a rectore et vicario et que in ipsa ecclesia de Sukel et infra eius parochiam consuevit percipere ab antiquo et salvo sibi iure patronatus in ipsa ecclesia et iure presentandi ad vicariam predictam si eam a personatu dividi contigerit in futurum ac insuper prefati rector et capellanus se ordinationi nostre sponte pure et simpliciter submiserunt Nos itaque super premissis inquisita et cognita veritate de consilio discretorum taliter duximus ordinandum in nomine Domini amen in ecclesia predicta de Suckel consolidamus personatui vicariam cum suis pertinentiis et iuribus universis et insuper ordinamus quod dictus rector in ordine quem cura requirit in ipsa ecclesia debitam faciat residentiam personalem et quod onera debita et consueta agnoscat que vicarius qui pro tempore fuerat agnoscere consuevit salvis nihilominus dicto priori et suo monasterio pensionibus possessionibus et aliis universis quatenus debebunt de iure sicud superius est expressum Preterea ordinamus quod dictus rector vel quicumque alius qui pro tempore tenuerit ecclesiam antedictam prefato I capellano solvat quatuor marcas argenti singulis annis nomine simplicis beneficii quousque in ecclesiastico beneficio eidem I provisum sit liberius per quemcumque ad duos anni terminos videlicet in festo annuntiationis beate Marie virginis duas marcas et in festo sancti Michaelis duas marcas apud Sockel sub pena xx solidorum fabrice ecclesie Wigorn solvendorum et ipsi I pro medietate committenda totiens et solvenda quotiens cessatum est a premissis det numeret et solvat rata manente nichilominus principali In cuius rei testimonium sigillum nostrum presentibus est appensum una cum sigillis dictorum prioris et rectoris et capellani qui ordinationem predictam concorditer acceptarunt Dat apud Herttelebur die dominica propria post festum Epiphanie anno domini eiusdem MCCLX quinto