Charter Document - 03160135

A touz ceus qui ces lettres verront Nos Boneface par la grace Deu Arceveske de Canterbury Gauter par meisme cela grace Eveske de Wyrecester Richard de Clare Cuens de Gloucestre et de Hertford Roger le Bigod Cuens de Norffoulk et Mareschal de Engleterre Pieres de Savoye Humfrey de Bohun Cuens de Heref et de Essex Villame de Fort Cuens de Aubemarle Johan de Plesseiz Cuens de Warrewick Phelipe Basset Johan Mansell Tresorer de Eurewik Roger de Mortemer James de Audichel Richard de Grey et Pieres de Montfort Saluz en nostre seignur Nos vos serons a savoir ke nostre Sires li Rois de Engleterre dune part et Simons de Montfort Cuens de Leycestre et Alienore Contesse sa fame dautre se sont mis en mise de la demande ke li devant dit Cuens et Contesse ont et font a nostre seignur le Roi kil ont bailees escrite et sa alee cest a savoir ous nobles homes Roger le Bigod Cuens de Norfouk et mareschal de Engleterre Humfroy de Bohun Cuens de Hereford et de Essex et Philipe Basset come en diseor et ordeneor et cette mise ont faite en tel manere ke ce ke li trois ou li dui daus dirons et ordenerons sur la devant dite demande haut et bas selont ce kil sevent et purrons apprendre par autres com ont les choses sont alees et douvent aler kil garderons et tendrons fermement et accompliront et cil troi ont jure ke a bone foi il irront en cette a faire et terminerons selont ce kie lur semblera ke bien foit Et nostre Sires li Rois a fait jurer Sire Pieres de Montfort en larme et li Cuens et la Contesse de Leycestre ont jure et donees lur letres overtes a nostre seigneur le Roi Et nostre sires li Roi a donees les letres ouverte a aus kil nostre sires le Rois et le Cuens et la Contesse de Leycestre garderont attendront fermement et accomplirant ce ke cil trois ou li dui dans dirronret ordenerons de la demande devant dire Et nos desus dit Arcevesk et Evesk avons promis in verbo veritatis et nos autres avons jure et Mun Sire Edward le Einznez filz nostre seignur le Roi a jure parle commandement nostre seignur le Roi et en avons donec et nos et li desus dit filz nostre seignur le Roi noz lettres overtes cil conte et la contesse de Leycestre de ces choses tenir et faire tenir et accomplir Et cil trois diseor et ordeneor ou li dui dans dirront lur dit et lur ordenement de danz la fette de Toz Sauiz prochainement avener al plus tost kil purront en bone foi et cil troi disoer et ordeneor ou li dui dans purront aler avant en la besoigne et terminer la nostre seignur le Roi et le Conte et la contesse de Leycestre ou lur procurators presenz ou non presenz Et donront de lur dit et delur ordinance tel come lur dit et lur ordenance sera lur lettres overtes a nostre seignur le Roi et al Conte et a la Contesse de Leycestre ou a lur comandement Et si aucuns des discors et ordeneors desus diz par mort ou par inpotence de sun cors ni posit estre len metra autre en sun leu par assentement des parties ou de lur procurateurs Et en les moins de ce nos avons doneis icestes nos letres overtes al Conte et a la Contesse de Leycestre avant dit saelees de noz saels lesqueles surent faites lan del Incarnation nostre seignur mil et deu cenz et cinquante et noef lendemain de la Magdaleyne a Westmoster