Charter Document - 03160126

Egregio principi et domino suo karissimo domino Ludivico dei gratia Francorum regi illustri Walterus miseratione divina Wigorniensis episcopus Simon de Monteforti comes Leycestrie Rogerus Vigod comes Northfolk et marescallus Anglie Richardus de Clara comes Gloucestrie et Hereford Iohannes comes Warenn et Hugo dictus Vigod salutem et paratam ad beneplacita voluntatem Cum de conventionibus et querelis quas dominus noster rex facit nobis et aliis gentis sue et nos sibi sit ab eodem domino rege et nobis in duos arbitros ex una parte et duos ex altera compromissum tali forma ut quod per eos concorditer vel maiorem eorum partem inde ordinabitur firmum et stabile habeatur et si forte dicti quatuor in proferendo dicto suo concordare nequiverint quod nobiles viri dux Burgundie et dominus Petrus camerarius sint in compromisso huiusmodi loco quinti quoad illud in quo vel quibus discordabunt arbitri memorati vestre excellentie supplicamus quatenus cum contentio que ratione conventionum et querelarum de quibus pretactum est inter nos vertitur sedari nequeat aliquatenus nisi vestro consilio mediante predictos dominus ducem et Petrum velitis inducere et facere ut in se recipiant onus illud Ad quod faciendum karissime domine moveant solitam benignitatem vestram confusio dissipatio vel iactura irreparabilis que imminent toti terre nec inveniri valeat via alia per quam discrimina hec vitari valeant quam per istam Datum die lune ante festum beate Margarete anno domine millesimo ducentesimo sexagesimo primo prope London