Charter Document - 03160124

A toz ceus qui ces lestres varront ou orront nos Boneface arcevesque de Cantorbir primaz de tote Angleterre Walter evesque de Wirecestr Simon de Montfort conte de Leicestr Richard de Clare conte de Glocestr et de Hertfort Roger le Bigot conte de Norfolch et mareschal de Angleterre Humfroi de Boun conte de Herefort et de Essex Guillaume de Forz conte de Albemall Iehan de Plessiz conte de Warewik Hugues le Bigot iustice de Angleterre Pierres de Savoie Roger de Mortemer Iehan Mansel tresorer de Everwik Phelipe Basset Richard de Grey Iames de Aldithel et Pierres de Montfort conseillers nostre seignor le roi de Angleterre saluz en nostre seignor Nos faisons assavoir que nos avons veue e entendue la forme de la pais qui est faite e iuree entre le noble roi de France Lois e lo noble roi Henri de Angleterre nostre seignor en teus paroles Henris par la grace de Deu rois Dangleterre sires Dillande et dux de Aquitaine Nous faisons a savoir a touz ceaus qui sunt et qui venir sunt que nous par la volente de Dieu ovec nostre chier cousin le noble roi Loeys de France avons pais faite et affermee en ceste maniere Cest a savoir que il done a nous et a noz hoirs et a noz successors toute le droiture que il avoit et tenoit en ces trois eveschies et es citez cest a dire de Limoges de Caorz et de Pierregort en fiez en demaines sauf lomage de ses freres se il aucune chose i tiennent dont il soient si honme et sauves les choses que il ne peut metre hors de sa main par letres de lui ou de ses ancessors les queles choses il doit porchacier en bone foi vers ceus qui ces choses tiennent que nous les aions dedenz la touz sainz en un an ou faire nous eschange couvenable a lesgart de prodes homes qui soient nonmez dune part et dautre le plus couvenable au profit des deus parties Et encore li devant diz rois de France nous dorra la value de la terre de Agenois en deniers chascun an selonc quelle sera prisiee a droite value de terre de prodes homes nomez dune part et dautre Et sera faite la paie a Paris au Temple chascun an a la quinzainne de lascension la moitie et a la quinzainne de la touz sainz lautre Et sil avenoit que celle terre eschaist de la contesse Iehane de Poitiers au roi de France ou a ses hoirs il seroit tenuz ou ses hoirs de rendre la nos ou a noz hoirs et rendue la terre il seroit quite de la ferme Et se ele venoit a autres que au roi de France ou a ses hoirs il nous dorroit le fie de Agenois ovec la ferme devant dite Et selle venoit en demaine a nous li rois de France ne seroit pas tenuz de rendre celle ferme Et se il estoit esgarde par le court le roi de France que pour la terre de Agenois avoir deussiens metre ou rendre aucuns deniers par raison de gagiere li rois de France rendroit ces deniers ou nouz tendrions et aurions la ferme tant que nos eussiens eu ce que nos aurions mis pour cele gagiere De rechief il sera enquis en bone foi et de plain a nostre requeste par prodes homes dune part et dautre a ce elleuz se la terre que li cuens de Poitiers tient en Caorsin de par sa fame fu dou roi Dengleterre donee ou bailliee ovec la terre de Agenois par mariage ou par gagiere ou tote ou partie a sa suer qui fu mere le conte Raymon de Tholose darreenement mort Et sil estoit trouve quil eust ainsi este et celle terre il eschaoit ou a ses hoirs dou deces la contesse de Poitiers il la donroit a nous ou a noz hoirs et se elle eschaoit a autre et il ert trouve par celle enqueste tote vois que elle eust einsi este donee ou bailliee si conme il est dit desus apres le deces la contesse de Poitiers il donroit le fie a nous et a nos hoirs sauf lomage de ses freres se il aucune chose i tenoient tant conme il vivroient De rechief apres le deces le conte de Poitiers li rois de France ou ses hoirs rois de France donra a nous et a noz hoirs la terre que li cuens de Poitiers tient ores en Xant outre la riviere de la Charente en fies et en demaines qui soient outre la Charente selle li eschaoit ou a ses hoirs Et se elle ne li eschaoit il porchaceroit en bone maniere par eschange ou autrement que nous ou noz hoirs laions ou il nos feroit avenable eschange a lesgart de prodes homes qui seront nomez dune part et dautre Et de ce que il donra a nous et a noz hoirs en fiez et en demaines nous et nos hoirs li ferons homage lige et a ses hoirs rois de France et ausi de Bordiax de Baionne et de Gascoingne et de toute la terre que nous tenons dela la mer Dengleterre en fiez et en demaines et des illes saucunes en i a que nos teignons qui soient du roiaume de France et tendrons de lui conme per de France et dux de Aquitainne Et de toutes ces choses devant dites li ferons nos servises avenables iusques a tant que il fust trouve queus servises les choses devroient et lors nous serions tenu de fere les tex conme il seroient trouve De lonmage de la conte de Bigorre de Armeignac et de Foiensat soit ce que droit en sera Et li rois de France nous claime quite se nous ou nostre anceseur li feismes onques tort de tenir son fie sanz li fere homage et sanz lui rendre son servise et touz arrerages De rechief li rois de France nouz dorra ce que cinc cenz chevaliers devroient couter raisonablement a tenir deus anz a lesgart de prodes homes qui seront nomez dune part et dautre et ces deniers sera tenuz a paier a Paris au Temple a sis paies par deus anz cest a savoir a la quinzaine de la Chandeleur qui vient prochainement la premiere paie cest a dire la sisieme partie et a la quinzaine de lascension ensuivant lautre paie et a la quinzaine de la touz sainz lautre et ausi des autres paies en lan ensuivant et de ce dorra li rois de France le Temple ou Lospital ou anbedeus ensemble en plege Et nos devons ces deniers despendre fors que u servise Dieu ou de lyglise ou au profit dou roiaume de Angleterre et ce par la veue des prodes homes de la terre esleuz par le roi de Angleterre et par les hauz homes de la terre Et par ceste pais faisant avons quite et quittons du tot en tot nous et nostre dui fil au roi de France et a ses ancessors et a ses hoirs et a ses successors et a ses freres et a leur hoirs et a lor successors pour nous et pour noz hoirs et pour noz successors se nous ou nostre ancessor aucune droiture avons ou eusmes onques en choses que li rois de France tiengne ou tenist onques ou si ancesor ou si frere cest a savoir en la duchee et en tote la terre de Normendie en la conte et en toute la terre Daniou de Tourainne et dou Mainne et en la conte et en toute la terre de Poitiers ou aillors en aucune partie du roiaume de France ou es illes saucunes en tient li rois de France ou si frere ou autres de par eus et touz arrerages Et ausi avons quitte et quittons nous et nostre dui fil a touz ceus qui de par le roi de France ou de par ses ancessors ou de ses freres tiennent aucune chose par don ou par eschange ou par vente ou par achat ou par ascensement ou en autre senblable maniere en la duchee et en toute la terre de Normendie en la conte et en toute la terre Daniou de Touraine et dou Maine et en la conte et en tote la terre de Poitiers ou ailleurs en aucune partie dou roiaume de France ou es illes desus dites sauf a nous et a noz hoirs nostre droiture es terres dont nos devons fere homage lige au roi de France par ceste pais si conme il est desus devise et sauf ce que nous poissiens demander nostre droiture se nous la cuidons avoir en Agenois et avoir la se la court le roi de France le iuge et ausi de Caorsin Et avons pardone et quitte li uns a lautre et pardonons et quittons touz mautalanz de contanz et de guerres et touz arrerages et toutes issues qui ont este eues ou qui porent estre eues en toutes les choses devant dites et touz domages et toutes mises qui ont este fait ou faites de ca ou de la guerres ou en autres manieres Et pour ce que ceste pais fermement et establement sanz nulle enfraignance soit tenue a touz iorz li rois de France a fait iurer en same par ses procureors especiax a ce establiz et si dui fil ont iure ces choses a tenir tant conme a chascun apartendra et a ce tenir ont obligie eus et leur hoirs par leur letres pendanz Et nos de ces choses tenir sonmes tenuz de doner seurte au roi de France des chavaliers des terres devant dites meismes que il nous done et des viles selonc ce que il nous requerra Et la forme de la seurte des homes et des villes pour nous sera telle Il iurrunt quil ne donront ne conseil ne force ne aide par quoi nos ne nostre hoir venissen encontre la pes Et sil avenoit que dex ne vuelle que nous ou nostre hoir venissen encontre ne le vousisson amender puis que li rois de France ou si hoir roi de France nous en auroient fet requerre cil qui la seurte auroient faite dedenz le trois mois que il les en auroient fet requerre seroient tenu destre aidant au roi de France et a ses hoirs contre nous et nos hoirs iusque a tant que ceste chose fust amendee soufisanment a lesgart de la court le roi de France Et sera renouvelee ceste seurte de dis ans en dis anz a la requeste du roi de France ou de ses hoirs rois de France Et nous ceste pais et ceste composicion entre nous et le devant dit roi de France afermee et toutes les devant dites choses et chascune si conme elles sunt desus contenues prometons et bone foi pour nous et pour noz hoirs et pour nos successors au devant dit roi de France et a ses hoirs et a ses successors loiaument et fermement a garder et que nous encontre ne vendrons par nous ne par autre en nulle maniere Et que riens navons fait nea ferons par quoi les devant dites choses toutes ou aucune en tout ou en partie aient mains de fermete Et pour ce que ceste pais fermement et establement sanz nulle enfraignance soit tenue a touz iourz nous a ce obliions nous et noz hoirs et avons fait iurer en nostre ame par noz procureors en nostre presence ceste pais si conme ele est desus devisee et escrite a tenir en bone foiant conme a nous apartendra et que nous ne vendrons encontre ne par nous ne par autre Et en tesmoignage de toutes ces choses nous avons fait au roi de France ces letres pendanz seelees de nostre seel Et ceste pais et toutes les choses qui sont desus contenues par nostre conmandement especial ont iure Edward et Eadmont nostre fil en nostre presence a garder et tenir fermemenet que il encontre ne vendront par els ne par autre Ce fu done a Londres le lundi prochain devant la feste saint Luc levangeliste lan de le incarnacion nostre seigneur mille cc cinquante nuevisme el mois de octouvre Et nos ceste pais et ceste composicion sicom ele est contenue pardesurs volons et otreons et loons et conseillons et en la presence au devantdit nostre segnor le roi et par son commandement especial nos arcevesque et evesque avons promis en paroles de proveres et nos conte et barons avons iure seur saintes evangiles que nos iceste pais sicomme el est desus contenue et totes les choses et chascune par soi qui sunt en cele pais contenues tant come a nos aparteint fermement et establement tendrons et garderons et que a bone foi traveillerons et porchacerons que nostre sires li rois Dengleterre et si hoir et toutes les choses et chascune par soi qui sunt contenues en ceste pais laelment acompliront et garderont fermement et cez serement avons nos fait en la presence des mesages lou noble roi de France envoiez a ce depar lui et recevanz depar lui Et en tesmoing de ceste chose nos avons mis nos saeaus en cestes presentes lestres Ce fu done ou leu e ou ior e en lan devantdiz