Charter Document - 03160123

A touz ceus qui cestes lettres verront ou orront nos Boneface arceveske de Canterbire primat de tote Angletere Walter evesk de Wyrcestr Simon de Montfort cunte de Leycestr Richard de Clare cunte de Gloucestr et de Hertford Roger le Bigod cunte de Norfouke et mareschal de Engletere Humfrei de Bohun conte de Hereford et de Essex Willame de Fort conte de Albermarl Iohan de Plesserz conte de Warrewik Hug le Bigod justise de Angleterre Piere de Savoye Roger de Mortemer Iohan Mansel tresorer de Eurewik Phelipe Basset Richard de Grey James de Audithel et Pieres de Montfort conseillers nostre seignur le roi de Angletere saluz en nostre seignur Nos fesons a savoir a touz ke nos avons veue et entendue la furme de la pais que est faite et iuree entre le noble roi de France Louis et le noble roi Henri de Angletere nostre seignur en tels paroles Cest la forme de la pais que est devisee entre les rois de France et de Angleterre Li rois de France donra al roi de Angl tote la dreiture ke le rois de France a et tient en ces treis eveschiez et es citez cest a dire de Limoges de Caours et de Pierregort en fiez et en demeines sauf lomage de ses freres se il aucune chose i tienent dont il soient si home et sauves les choses que li rois de France ne poet mettre hors de sa main par letres de lui ou de ces ancesseors les queles choses li rois de France doit purchacer a bone foi vers tous qui ces choses tienent ke li rois de Angl les ait dedenz la toz sainz en un an ou faire lui eschange avenable al esgard de prodeshomes qui soient nomez dune part et dautre les plus covenable al profit des dels parties Et encore li devant dit rois de France donra al roi de Angl la value de la tere de Agenois en deniers chascon an selont ce que ele sera prisee a droite value de tere par prodeshomes nomez dune part et dautre et sera la paie faite al temple a Paris chascun an a la quinzeine de lascension la moite et la quinzaine de la toz sainz lautre Et se il avenoit ke cele tere eschait de la contesse Iohanne de Poitiers al roi de France ou a ses hoirs il serroit tenuz ou ses hoirs de rendre la al roi de Angl ou a ses hoirs Et rendue la terre il serroit quites de la ferme Et se ele venoit a autres kal roi de France et a ses hoirs il donroit al roi de Angl le fie de Ageneis avec la ferme devant dite et se ele venoit en demeine al roi de Angl li rois de France ne serroit pas tenuz a rendre cele ferme Et se il estoit es garde por la cort le roi de France ke par la tere de Ageneis aucuns deust li rois de Angl mettre ou rendre avouns deners par raison de gagier li rois de France rendroit cels derniers ou le roi de Angl tendroit et avroit la ferme tant quil eust eu ce quil avroit mis pur cele gagiere Derechief il sera enquis en bone foi et de plein a la requeste le rois de Angl par prodeshomes a ce esleuz dune part et dautre se la tere ke li cuens de Poitiers tient en Caorsin de par sa ferme fu del roi de Angl donee ou baillee avec la tere de Agenois par mariage ou par gagiere ou tut ou partie a sa suer ke fu mere le conte Reym de Tholes darreinement mort Et sil estoit trove ke il eust einsi este et cele tere eschaoit al roi de France ou a ses hoirs del deces la contesse de Poitiers il la donroit al roi de Angl ou a ses hoirs Et se ele eschaoit a autre et il iert trove par cele enqueste tote voies ke ele eust este einsi donee ou baillee cum il est dit desus apres le detes la contesse de Poitiers il donroit le fie al roi de Angl et a ses hoirs sauf lomage de ses freres se il aucune chose i tenoient tant com il viveroient Derechief apres le deces del conte de Poitiers li rois de France ou ses hoirs rois de France donra al roi de Angl ou a ses hoirs la tere que li cuens de Poitiers tient ores en Xanct outre la riviere de Charente en fiez et en demeines qui soient outre la Charente se ele eschaoit al roi de France ou a ses hoirs Et se ele ne li eschaoit il purchetera en bone maniere par eschange ou autrement ke li rois de Angl et ses hoirs laient ou li fera avenable eschange al esgard de prodeshomes qui seront nomez el une part et dautre Et de ce que li rois de France donra ou roi de Angl et a ses hoirs en fiez ou en demeines li rois de Angl et si hoir feront homage lige al roi de France et a ses hoirs rois de France et ausi de Burdeaus et de Baione et de Gascoigne et de tote la tere quil tient de ca la mer de Angl en fiez et en demeines et des isles saucune en ia ke le roi de Angl tiegne qui soient del roiaume de France et tendra de li cum pers de France et dux de Aquitaigne Et de tote ces choses devant dites fera li rois de Angl servises avenables iusque a tant kil fust trove quels servises les choses devroient et lors il serroit tenuz de faire les tels cum il serroient trove de lomage de la conte de Bigorre de Armeignac et de Falansac soit ce ke droiz en sera Derechief li rois de France donra al roi de Angl ce ke cinc cenz chevaliers devroient custer reisnablement a tenir deus anz al esgard de prodeshomes qui seront nomez dune part ou dautre et ces deniers sera tenuz li rois de France a paier a Paria al temple a sis paies par deus anz cest a saveir a la quinzeine de la chandelor ke vient procheinement la premiere paie cest a dire la sisime partie et a la quinzeine de lascension ensuint lautre paie et a la quinzeine de la toz seinz lautre et ausi des autres paies en lan ensuant Et de ce donra li roi de France ses letres pendanz et le temple ou lospital ou ambedeus ensemble plege Et le roi de Angl ne doit ces derniers despendre for kel servise deu ou del eglise ou al profit del roiaume de Angl et ce par la veue de prodeshomes de la tere esleuz par le roi de Angl et par les hauz homes de la tere Et par ceste pais faisant quitera li roi de Angl et si dui fil al roi de France et a ses antesseors et a ses hoirs et a ses freres se le roi de Angl ou si antesseors aucune dreiture ont ou ourent onques en chose ke li rois de France tiegne ou tenist onques ou si antesseors ou si frere cest a savoir en la duchee et en tote la tere de Normandie en la conte et en tote la tere de Aniou de Toraine et del Maine et en la conte et en tote la tere de Poitiers ou ailliurs en aucune part del roiaume de France et es isles saucune en tienent le roi de France ou si frere ou autre de els et toz arrerages Et ausi quiteront li roi de Angl et si dui fil a touz cels qui depar le roi de France ou de par ses ancesseors ou de ses frieres tienent aucune chose par don par eschange ou par vente ou par achat ou par acensement ou en autre semblable maniere en la duche et en tote la tere de Normandie et en la conte et en tote la tere de Aniou et de Toraigne et del Maine et en la conte et en tote la tere de Poitiers ou aillours en aucune part el roiaume de France ou es isles desus dites sauve al roi de Angl et a ses hoirs lur droiture es teres dont il deit faire al roi de France homage lige par ceste paies sicum il est desus devise et sauf ce ke li rois de Angl puisse demander sa droiture se il la quide avoir en Agenois et avoir la si la curt del roi de France le iuge et ausi de Caorsin Et donra li rois de Angl al roi de France les lettres ke on dit kil a del roi Richard son frere de quitance de totes ces choses par eschange kil en ont sil puet ces lettres trover ou avoir et se il ne les puet trover ne avoir il donroit ses lettres pendanz al roi de France et des barons et des prelaz et des prodeshomes qui i furent de testmoinage de la quitance ke li rois Richard en fist Et aura encore el sairement et es lettres pendanz le roi de Angl ke puis cele quitance nule dreiture il ne li dona en nule de ces choses Et ceste meisme quitance al roi de France et as autres devant diz fera le roi de Angl faire a sa suer la contesse de leycestre pur foi et pur ses hoirs et des enfanz meismes de cels qui le requera Et le rois de France clamera ausi quite al roi de Angl se il ou si ancesseors si firent onques tort de tenir son fie sanz li faire homage et sanz li faire son servise et toz arrerages Et pardonront et quiteront li uns a lautre toz mautalenz de contenz et de guerres et touz damages et totes mises kil ont fait ou faites de ca ou de la en guerres et en autre manieres Et pur ce ke ceste pais fermement et establement sanz nule enstaignance soit tenue a toz iurs li roi de Angl et si dui fil et sa suer la contesse de Leycestre et si enfanz iuront ces choses a tenir tant com a chescon apertendra et a ce tenir obligeront eus et lur hoirs par lur letres pendanz et de ce donra seurte li roi de Angl des chevaliers des teres devant dites meismes que le rois de France li donra et des viles solont ce ke li roi de France leu requerra Et la forme de la seurte des homes et des viles pur le roi de Angl sera cele Il iurront kil ne donront ne conseil ne force ne aide par quoi le roi de Angl ne si venissent en contre la pais et se il avenoit ke deu ne voille ke il venissent encontre et il nel vousissent amender puis ke le roi de France ou si hoir rois de France le en averoient fait requerre cil qui la seurte avroient fete dedenz les trois mois ke le roi de France les en avroit fet requerre serroient tenu destre aidant al roi de France et a ses hoirs contre le roi de Angl et [] ses hoirs iusque a tant ke ceste chose fust amendee suffisaument a lesgard de la cort le roi de France Et sera renovelee ceste seurte de dis anz en dis anz et le requeste del roi de France ou de ses hoirs rois de France et ausi de ceste pais tenir li roi de France obligera soi et ses hoirs par ses lettres pendanz et iurra il et ses fils ainznez ou si dui fil ainznez la pais a tenir a bone foi tant com a chascon apertendra Et nos ceste pais et ceste composicion sicum ele est contenue par desus volons otrions loons et conseillons et en la presence al devant dit nostre seignur le roi et par son comandement especial nos arceveske et evesk avons promis en parole de provoires et nos contes et barons avons iure sur saintes evangiles ke nos i ceste pais si com ele est desus contenue et totes les choses et chascune par soi qui sont en cele pais contenues tant cum a nos apertient fermement et establement tendrons et gardrons et ke a bone foi travaillerons et purchacerons ke nostre sires li roi de Angl et si hoir toites les choses et chascune par soi que sont contenues en ceste pais leaument acompliront et garderont fermement Et cest sairement avons nos fait en la presente des messages le roi de france envoiez a ce de par lui et receuant de par lui Et en testmoin de ceste chose nos avons mis noz se aus en cestes presentes lettres Ce fu done Londres lan del incarnacion nostre seignur mill cc cinquante novisime lendemain de la sainte Margarete le mois de Iul