Charter Document - 03160066
| Charter Number: | 03160066 |
|---|---|
| Cartulary Title: | Worcester 1218-1268 Volume 13 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1242 |
| Date type: | Internal, Feast, A.D. |
| Resource Link(s): |
|
Charter:
Universis Cristi fidelibus presentes literas inspecturis vel audituris Walterus permissione divina Wigorn ecclesie minister humilis salutem in domino sepiternam Noverit universitas vestra quod cum W rector ecclesie de Elmeleye petens nomine ecclesie sue liberam pasturam ad averia sua pascenda in bosco prioris et conventus sancte Barbare apud Astone inter villam de Eystone et villam de Elmeleye sito ipsos coram domini regis justiciariis per breve regis traxisset in causam ac post modum pro se et ecclesia sua dicte petitioni penitus renunciasset nos ne forte per ipsam renunciationem ius ecclesie de Elmeleye indebite lederetur utrum prefata pastura ad ipsam ecclesiam de iure pertineret de voluntate parcium et assensu inquiri fecimus diligenter cumque ex virorum fidedignorum iuratorum depositionibus nobis liquido constaret prescriptam ecclesiam in predicta pastura ius nullum hactenus habuisse nos renunciationem ipsius rectoris in hac parte ratam habentes sibi super dicta pastura perpetuum duximus silencium inponendum In cuius rei testimonium presens scriptum sigilli nostri impressione roboravimus Actum apud Winchecumbe die mercurii proxima post festum Sancti Iacobi apostoli anno gratie millesimo ducentesimo quadragesimo secundo