Charter Document - 03160060

Walterus dei gratia Wigorn dilectis in Cristo filiis [] officiali suo [] abbati Alyncestris et magistro H de Fonteneto rectori ecclesie de Fladebyr salutem gratiam et benedictionem Cum de voluntate et assensu dilecti in Cristo filii nobilis viri domini Willelmi de Bellocampo ecclesie de Lench Roculphi nostre dioecesis veri patroni ac etiam ad ipsius interpellationem duximus ordinandum quod ipse qui futuris temporibus ad regimen dicte ecclesie a dicto nobili vel suis heredibus debeat presentari sit in sacerdotali ordine constitutus vel talis qui in proximo in sacerdotem valeat promoveri et vicarius censeatur et ibi residentiam faciat personalem necnon quod ad sui sustentationem quandam partem fructuum tam in decimis oblationibus obventionibus et aliis ad dictam ecclesiam pertinentibus ad valorem decem marcarum secundum communem estimationem exceptis oneribus ordinariis que idem per nostram ordinationem sustinere tenetur large percipiat annuatim extentaque terre arabilis et prati ad dictam ecclesiam pertinente infra dictas decem marcas computata que quidem vicario qui pro tempore fuerit volumus assignari Ac etiam de prefati nobilis voluntate et assensu residuum dictorum fructuum annuorum sive in decimis seu obventionibus ad egestatem monialium de Cochulle devote domino obsequentium relevandam dictis monialibus in perpetuum optinendum duxerimus assignandum Mandamus quatinus ad dictum locum aliquo certo die statuto personaliter accedentes predicta omnia et singula ad predictam ecclesiam pertinentia secundum arbitrium fide dignorum taxari et estimari in vestra presentia faciatis certas portiones in decimis oblationibus obventionibus et aliis usque ad valorem decem marcarum annis singulis recipiendas una cum domibus grangiis ad rectorem pertinentibus et terram arabilem atque pratum vicario assignetis et tanto portiones ipsius largitius estimantes vel aliquid sue portioni addentes quia secundum nostram ordinationem omnia onera ordinaria sustinere tenetur Totum siquidem residuum sive in decimis oblationibus et aliis una cum aliqua area de terra ecclesie vel de curia quondam rectoris que absque magno gravamine vicarii partiri valeat in qua dicte moniales domos ad suos fructus et animalia recipienda possint construere dictis monialibus deputetis et totum factum vestrum in scriptis redigi faciatis ad memoriam futurorum vestris sigillis eadem consignantes Datum London in crastino sancte Agathe virginis anno domini MCCLXI